Ish-tenistja italiane Camila Giorgi ka probleme me administratën tatimore. Më 7 maj, ajo doli në “pension ekspres” dhe siç shkruan Gazzetta dello Sport, autoritetet nuk e gjejnë dot.
Administrata tatimore është në kërkim të saj për të zgjidhur disa mosmarrëveshje për taksat me të.
Camila Giorgi fitoi gjashtë milionë euro në karrierën e saj vetëm nga çmimet, duke mos bërë asnjë raportim fiskal.
Raportohet se nuk ka asnjë të dhënë për vendndodhjen as të nënës së saj Claudia, babait Sergio dhe vëllezërve Amadeus dhe Leandro. Camila së fundmi iu drejtua fansave të saj përmes Instagram-it dhe njoftoi tërheqjen e saj.
“Për më shumë lajme, ndiqni faqen time në Instagram. Gjithçka që bëhet publike është false. Ka shumë informacione të pasakta për planet e mia. Mezi pres të ndaj me ju informacione për atë që do të vijë më pas. Është një lumturi e vërtetë të ndaj jetën time me ju. Vazhdojmë së bashku me këtë udhëtim”, ka shkruar Camila në Instagram, ku numëron 740 mijë ndjekës që kënaqen me fotot e saj.
Camila, e cila punon edhe si modele, dikur kishte një shtëpi në Miami, por të dhënat e fundit të çojnë në San Diego. Gjithashtu ka mundësi që ajo të ketë shkuar në Argjentinë, në vendin e babait të saj, shkruajnë mediat italiane.
Përveç autoriteteve, edhe WTA(Federata Botërore e Tenisit) u përpoq ta kontaktonte italianen, por pa sukses. Gazetarët e Gazzetta-s u përpoqën të kontaktojnë dikë nga kompania e saj e modës Giomila, por askush nuk iu përgjigj telefonit apo e-mailit.
Është interesante se familja Giorgi në Itali nuk zotëron asgjë. Ata nuk kanë as pasuri të paluajtshme dhe as sende të tjera në zotërim. /tesheshi.com/
