Nën një entuziazëm naiv për kthimin e Trump-it në presidencën amerikane, ngjashëm me atë të opozitës në Shqipëri, Beogradi po merr një goditje të fortë nga SHBA-ja.
Më saktë, presidenti Vuçiç deklaroi se pas pak ditësh SHBA-të do të vendosin sanksione të plota ndaj industrisë serbe të naftës për shkak të pronësisë ruse.
“Më duhet të them, një nga lajmet më të vështira të viteve të fundit, na është konfirmuar. Ende nuk e kemi marrë letrën zyrtare, por lajmi na është konfirmuar dhe shërbimi ynë e ka konfirmuar me shërbimet simotra. Shtetet e Bashkuara të Amerikës do të vendosin brenda pak ditësh sanksione të plota kundër Industrisë së Naftës së Serbisë për shkak të pronësisë ruse”, tha Vuçiç për TV Informer-in pro-qeveritar.
Vuçiç shtoi duke thënë se vendimi i SHBA-së për vendosjen e sanksioneve ndaj NIS ishte gjeopolitik dhe i drejtuar kundër Rusisë dhe se ishte llogaritur të “na detyronte të vendosim sanksione ndaj Rusisë”.
“Ky është një vendim shumë më i rëndë”, tha lideri serb.
“Ky është një vendim gjeopolitik. Një vendim shumë më i madh se gjërat e përditshme këtu, të cilat zgjidhen në një mënyrë apo tjetër”.
Presidenti serb pretendon se edhe britanikët po i bashkohen sanksioneve të Uashingtonit.
“Dhe kjo do të thotë të gjithë”, tha Vuçiç. “Sepse kur një kompani është nën sanksionet amerikane, askush nuk do të punojë me të. Sigurisht, kjo na hap probleme me miqtë tanë rusë për gjithçka. Nga politike në gjithçka tjetër”, tha presidenti i Serbisë. /tesheshi.com/
