Ahmed Muhamedi, katërmbëdhjetëvjeçari që u arrestua muajin e shkuar në Teksas pasi ora e bërë prej tij dhe e marrë me vete në shkollë u mendua nga drejtuesit e institucionit të jetë bombë, do t’i vijojë studimet në Katar.
Këtë e lajmëroi dje familja e Ahmedit, vetëm pak orë pasi djali i tyre qe në Shtëpinë e Bardhë dhe u takua me presidentin Obama.
I riu ka pranuar një ofertë të bërë nga Fondacioni i Katarit për të studiuar në Programin e Novatorëve të Rinj.
Ahmedi do të marrë një bursë të plotë studimi nga fondacioni dhe do të zhvendoset me tërë familjen në Katar. Ai qe në Doha dhe më herët këtë muaj, në vijim të një turneu anekënd botës pas ftesave të panumërta në adresë të tij.
Në një njoftim të Fondacionit të Katarit, të bërë të martën, thuhet mes të tjerash se Programi i Novatorëve të Rinj “i inkurajon përfituesit të ndjekin aspiratat e tyre në arsim, ndërsa ushqen një kulturë krijueshmërie dhe novacioni.”
Arrestimi i adoleshentit në shtator bëri bujë të madhe, por njëkohësisht e bëri të famshëm të dëmtuarin. Pas një serie vizitash ngado e pas pritjeve nga emra të njohur të fushave të ndryshme, bursa e dhënë nga Fondacioni i Katarit është dhurata më e fundit për të. /tesheshi.com/
