Rreth 40 mijë refugjatë pritet të arrijnë në Gjermani në dy ditët e ardhshme, thanë burime zyrtare, duke dyfishuar në këtë mënyrë numrin e atyre që hynë në këtë vend gjatë fundjavës së shkuar.
Pjesa më e madhe pritet të hyjnë në qytetin jugor të Mynihut, por janë ngritur shqetësime nëse rajoni mund të përballojë edhe një fluks tjetër të madh refugjatësh, pasi një numër i konsiderueshëm refugjatësh gjetën mikpritje javën e shkuar.
Rreth 4 mijë trupa janë vendosur në terren në Gjermani, për të dhënë mbështetje logjistike në pritjen e refugjatëve. Qeveria gjermane edhe pse e lënë në baltë nga shtetet e tjera europiane, ka deklaruar se do të mirëpresë kërkesat për azil pavarësisht se në cilin shtet vunë këmbë për herë të parë këta persona. Sipas rregullave të BE-së, refugjatët e azilkërkuesit duhet të regjistrohen e kërkojnë azil në vendin e parë ku arrijnë.
Me dhjetëra mijë, shumica sirianë, kanë ndërmarrë rrugën e vështirë përmes Turqisë, Ballkanit e Hungarisë për të arritur në destinacionet e dëshiruara, Gjermani, Austri dhe Suedi, që janë edhe vendet me rregulla më liberale të dhënies së azilit.
Vala e refugjatëve nuk ndalet dhe vetëm në Maqedoni kanë hyrë nga Greqia një numër njerëzish, që sipas OKB-së shkon deri në 500 emigrantë në orë.
Pas Maqedonisë, ata i drejtohen Hungarisë, ku një pjesë kanë mbetur të bllokuar në kufi për shkak se autoritetet hungareze kërkojnë të aplikohet rregulli i BE-së për regjistrimin e tyre. Pamjet nga kampet hungareze ku refugjatët “luftojnë” për ushqimin që iu hidhet me qese, bënë xhiron e botës dhe nxitën kritika ndërkombëtare. /tesheshi.com/
