Konsumatorët gjermanë janë gjithnjë e më të pakënaqur me ofertën në supermarkete. Fillimisht u rritën çmimet, më pas u zvogëlua paketimi dhe tani është ulur edhe cilësia e produktit.
Kostot e larta të energjisë, lëndëve të para, pagat e punonjësve, zinxhirët e ndërprerë të furnizimit – konsumatorët po vërejnë se kompanitë po i kalojnë këto kosto mbi shpinën e tyre, veçanërisht në supermarkete dhe pika karburanti. Por në shumë raste, nuk janë vetëm çmimet që janë rritur: pakot janë gjithashtu shpesh më të vogla.
Qendra e Këshillimit të Konsumatorit në Hamburg e shpalli margarinën Rama të prodhuar nga Upfield “Mashtrimi i vitit 2022”, shkruan Deutsche Welle.
Përmbajtja e ambalazhit të saj u ul nga 500 në 400 gramë, me çmimin e njëjtë, 2.19 euro. Kështu, çmimi i margarinës u rrit praktikisht me 25 për qind.
Ky fenomen u bë i njohur si “shrinkflation”.
Inflacioni nuk është më i lartë rekord, por në supermarkete po shfaqet një tendencë e re: “skimpflation”, sipas fjalës angleze “skimp” që do të thotë “të kursesh”.
Prandaj, prodhuesit jo vetëm që rrisin çmimet, por edhe zvogëlojnë cilësinë e produktit. Termi u krijua nga kanali televiziv amerikan NPR në 2021.
“Fenomeni po përhapet edhe në Britaninë e Madhe dhe Gjermani,” raporton për transmetuesin publik ARD Sabine Hübner, eksperte për cilësinë në sektorin e shërbimeve.
Kështu, për shembull, pas fillimit të luftës në Ukrainë në vitin 2022, prodhuesit e patateve të skuqura zëvendësuan vajin e lulediellit me vaj palme, sepse vaji i lulediellit nuk ishte më i disponueshëm. “Ajo që ishte menduar si një masë emergjente tani është bërë pjesërisht një fenomen i njohur,” shpjegon Hübner. Ndonëse vaji i lulediellit prej kohësh është sërish në sasi të mjaftueshme, sipas të dhënave të tyre, vetëm njëri nga prodhuesit e anketuar i është rikthyer produktit më cilësor.
Është veçanërisht e papranueshme që disa prodhues nuk treguan ndryshime në përbërës në paketim. Vlerat ushqyese nuk përputheshin më me të dhënat origjinale. Përveç kësaj, vaji i palmës është më i pashëndetshëm se vaji i lulediellit për shkak të përmbajtjes më të lartë të acideve yndyrore të ngopura.
Qendra e Këshillimit të Konsumatorit në Hamburg gjithashtu ndan të njëjtën përvojë.
Kjo qendër, për shembull, raporton për cilësinë më të dobët dhe çmimin më të lartë të çokollatës së shitur në zinxhirin e njohur Aldi.
“Në variantet Chocolat Amandes Edel Marzipan – çokollatë me qumësht dhe Chocolat Amandes Edel Marzipan – çokollatë me përqindje të lartë kakaoje, përdoret vetëm 38 për qind marzipan i imët për çokollatë, ndërsa më parë përmbante 45 për qind”, ankohen avokatët e konsumatorit.
Përqindja e marzipanit të fëstëkut dhe nugatit është zvogëluar gjithashtu në varietetin Chocolat Amandes Marzipan. Në të njëjtën kohë, të dy llojet tani kushtojnë 1.69, në vend të 1.49 euro. /tesheshi.com/
