“Deri javën e kaluar, presidenti i SHBA Joe Biden ishte shefi im. Ai përdori idenë e sigurisë hebreje si një armë për të justifikuar krimet në Gaza. Nuk mund të rrija më duarkryq, ndaj dhashë dorëheqjen nga pozicioni im në Departamentin e Brendshëm të SHBA-së. Kështu që unë u bëra zyrtarja e parë hebreje e emëruar politikisht në administratë që dha dorëheqjen publike – në shenjë proteste dhe pikëllimi – për shkak të mbështetjes së Biden për gjenocidin në Gaza, ku janë vrarë më shumë se 35,000 palestinezë”.
Kështu e nisi shkrimin e saj në gazetën britanike The Guardian asistentja speciale e shefit të kabinetit të Departamentit të Brendshëm të SHBA-së, ku tha se vendimi për të dhënë dorëheqjen ishte shumë i vështirë, por edhe i nevojshëm dhe shumë urgjent, pasi presidenti i Shteteve të Bashkuara të Amerikës shkatërroi idenë e sigurisë së hebrenjve dhe armatosi shoqërinë e tyre, duke e përdorur të gjithë këtë si mburojë për të shmangur përgjegjësinë për rolin e tij në këto krime.
Kjo e re hebreje, Lili Greenberg, thotë se ajo punoi shumë për të zgjedhur këtë administratë, fillimisht si organizatore e fushatës për Zv/Presidenten Kamala Harris gjatë zgjedhjeve presidenciale të vitit 2019 dhe më pas në zgjedhjet e përgjithshme në Arizona, duke shtuar: “Por tani, siç po shikoj, bashkëfajësia e SHBA-së në masakrën e vazhdueshme të palestinezëve në Gaza, shoh se, në kohë terrori të madh, shumë njerëz të fuqishëm kanë zgjedhur të mos bëjnë asgjë”.
Ashtu si shumë amerikanë hebrenj, ajo tha se e ka prejardhjen nga refugjatët nga Evropa dhe është një e mbijetuar e persekutimit sistemik.
Ajo shtoi: “Gjyshja ime shtatzënë i mbijetoi masakrës duke u fshehur brenda një karroce të tërhequr me kuaj dhe më pas kaloi oqeanin e vetme, duke kërkuar siguri në një tokë të re”.
Ajo tha se në muajt pas 7 tetorit, po ndodh e njëjta gjë me palestinezët – fëmijë, të moshuar, gazetarë dhe të tjerë – që përpiqeshin t’i mbijetonin bombardimeve pa dallim që synonin shtëpitë e tyre…bombardimet që u mundësuan nga Shtetet e Bashkuara të Amerikës.
Ajo tha se ka mësime që mund të mësojmë “nga besimi dhe historia jonë. Ndërsa çdo ditë shikojmë fotografitë e të zhvendosurve në Gaza, ato skena na kujtojnë të dashurit tanë që u vranë në Holokaust. Ato skena më kujtojnë gjithashtu Nakba-n: tragjedia që ndodhi në vitin 1948 kur shoqëria palestineze u shkatërrua, ku rreth 700,000 palestinezë u zhvendosën nga atdheu i tyre për të formuar atë që tani është Izraeli modern. Holokausti dhe Nakba janë njësoj”.
Grinberg e përfundoi artikullin e saj duke thënë: “Dorëheqja ndodhi në 76-vjetorin e Nakba, sepse nuk mund t’i shërbeja më vendit tim me një president që refuzon të ndalojë një tjetër katastrofë”. /tesheshi.com/
