Gara për titullin kampion të futbollit anglez do të vendoset të dielën, në ditën e fundit të sezonit, me Manchester Cityn dhe Arsenalin që shpresojnë për trofeun, të cilët i ndajnë vetëm dy pikë.
Kryesuesi i tabelës, Manchester City pret West Ham-in në Etihad Stadium, teksa kërkon të sigurojë titullin e katërt radhazi në Premier League.
West Ham do të përfundojnë në vendin e nëntë, pavarësisht rezultatit të ndeshjes kundër City-t, pasi janë pesë pikë prapa Manchester United-it në vendin e tetë, ndërsa kanë katër pikë përpara Bournemouth, që është në vendin e 10-të.
Motivi i vetëm për West Ham është të ndihmojë ish-mesfushorin e tyre Declan Rice, i cili u largua për në Arsenal verën e kaluar.
“Topçinjtë” mirëpresin Evertonin, i cili gjithashtu do të luajë pa interes të veçantë. Klubi nga Merseyside është 14 pikë larg zonës së rënies.
Çfarë duhet të bëjnë pretendentët për titull për t’u bërë kampionë?
Ekuacioni për Manchester City-n e drejtuar nga Pep Guardiola është shumë i thjeshtë – mund West Ham-in dhe ruan kurorën e Premier League.
Por nëse City barazon ose humbet, atëherë Arsenali ka një shans.
Topçinjtë e dinë se me dy pikë prapa City-t, fillimisht duhet të mposhtin Evertonin.
Ajo që skuadra e Mikel Artetës ka në favor të tyre është një golavarazh më i mirë. Pra, nëse City barazon dhe Arsenali fiton, atëherë dy klubet do të përfundojnë në nivel pikësh, por trofeu do t’i shkojë Arsenalit, për herë të parë në 20 vjet.
Sa do të thotë titulli për Manchester City-n dhe Arsenalin?
Është e vështirë për Manchester City-n të kapërcejë suksesin e vitit 2023, kur ngriti pesë trofe. Por ai mund t’i fitojë të tre trofetë anglezë, sepse tashmë ka fituar titullin e EFL Cup, ndërsa e pret finalen e FA Cup kundër Manchester United.
City gjithashtu dëshiron të bëjë histori, pasi të bëhet skuadra e vetme që fiton katër tituj radhazi në Premier League.
Më parë, disa klube kanë fituar titullin tre herë radhazi, duke përfshirë Manchester United dhe Arsenal, por nuk arritën ta bëjnë këtë për herë të katërt.
Për Arsenalin, i cili fitoi tre tituj radhazi nën drejtimin e Herbert Chapman në vitet 1930, suksesi i së dielës do të shënonte fundin e një pritjeje 20-vjeçare për një titull lige.
Ata e ngritën trofeun për herë të fundit nën drejtimin e Arsene Wenger-it. Ishte titulli i tretë i ligës së trajnerit francez me Topçinjtë, të cilët krijuan një pjesë të tyre të historisë kur kaluan sezonin pa asnjë humbje të vetme, rrugës për të dytin nga këta tre trofe.
Kur u vendos titulli në raundin e fundit?
Ka pasur disa përfundime emocionuese në garën për titull, por shembulli më i famshëm ishte goli i vonë i Sergio Agueros për Manchester City në 2011/12.
Argjentinasi shënoi në kohën e fundit për të mposhtur Queens Park Rangers në fund të tabelës dhe për t’i dhënë City-t titullin e parë të ligës që nga viti 1968.
Ai i mohoi trajnerit të atëhershëm të Manchester United, Alex Ferguson, titujt e njëpasnjëshëm atë sezon dhe vonoi planet e tij të pensionimit pasi ai qëndroi dhe për një vit tjetër për t’ia sjellë trofeun United për herë të 13-të dhe të fundit.
Lajmi i keq për Arsenalin është se asnjë ekip nuk kaloi nga i dyti në i pari në ditën e fundit të sezonit. /tesheshi.com/
