Nga Donat Maloku
Për ta përfaqësuar Kosovën në cilësinë e ambasadorit në qendrat vendimmarrëse ndërkombëtare, nuk mjafton të kesh karrierë të pasur profesionale apo të jesh njohës i mirë i marrëdhënieve ndërkombëtare. Mjafton, preferenca politike që të merret “viza” për t’u emëruar ambasador i Kosovës në ndonjë shtet.
Se diplomacia kosovare nuk është në shërbim të interesit shtetëror por ‘akomodim’ i njerëzve politikë, më së miri e tregon shkresa që ministri i Punëve të Jashtme i Kosovës Hashim Thaçi (në emër të Qeverisë së Kosovës), i ka dërguar Komisionit për Punë të Jashtme lidhur me dy kandidatë të propozuar për ambasadorë të Kosovës në SHBA dhe Japoni, përkatësisht znj. Vlora Çitaku dhe Leon Malazogu (edhe pse ky i fundit është pjesë e shoqërisë civile).
Njohësit e diplomacisë dhe përfaqësues opozitarë, thonë se diplomacia kosovare që nga qeverisja e parë LDK-PDK është bërë çerdhe e rehatimit të militantëve partiakë.
Shpërfytyrim total i diplomacisë
Labinot Hajdari, bashkëthemelues i Qendrës Kosovare për diploma, thotë se që nga viti 2008, përkatësisht në kohën e qeverisjes së koalicionit LDK-PDK, është filluar me emërimet e përfaqësuesve diplomatikë, të cilët kryekëput kanë qenë me referenca partiake, duke e bërë kështu diplomacinë kosovare pjesë e miltantizmit partiak. “As atëherë, e as tash, diplomacia kosovare nuk u konceptua si institucion profesional që duhet të jetë në shërbim të politikës shtetërore, por si institucion i përbërë me individë të përzgjedhur nga koalicionet qeverisëse. Fatkeqësisht nuk kanë qenë të vetme emërimet e ambasdorëve, por “akomodimi” i militantëve të partive politike ka vazhduar pothuajse në të gjitha nivelet hierarkike në ambasadat dhe konsullatat e Kosovës, dhe kjo i ka kushtuar mjaft shumë përfaqësimit dhe imazhit të shtetit të Kosovës. Deri tani nuk besoj se është bërë ndonje emërim duke vlerësuar profesionalizimin, para militantizimit, dhe dyshoj se do të ndryshoj kjo gjendje!”, ka deklaruar njohësi I diplomacisë Hajdari.
Zëdhënësi i Aleancës për Ardhmërinë e Kosovës (AAK), Ernest Luma, ka deklaruar për portalin “Te Sheshi”, se deri më sot referenca politike ka qenë kriteri i parë i punës në secilën ditë dhe në secilën fushë, të kësaj qeverie. “Klanet klanore e farefisnore, të afërta me pushtetin, kanë përfituar në punëkryerje të ndryshme, në kuadër të këtyre institucioneve, në punësim kudo në sektorin publik dhe në diplomaci, po ashtu. Pra kemi të bëjmë me një shpërfytyrim total të shtetit dhe të shtetësisë sonë, fatkeqësisht edhe në rrafshin diplomatik. Edhe në këtë fushë, sejmen i pushtetit e jo shërvues i shtetit, duhet të jesh në radhë të parë. Këto janë kritere të tyre”, ka deklaruar Luma.
Njohësi i rrethanave politike në Kosovë, Faik Krasniqi, ka deklaruar për portalin “Te Sheshi”, se përkundër faktit që për të gjitha misionet diplomatike të Kosovës, nga buxheti i Kosovës për çdo vit ndahen nga 15 milionë euro, përfaqësuesit diplomatikë të Kosovës jo vetëm dështuan që t’ia përmirësojnë imazhin vendit në arenën ndërkombëtare, mirëpo disa diplomatë me veprimet e tyre e rrënuan edhe më shumë një imazh të tillë. “Në vend se në ambasada dhe konsullata të dërgohen atashe ekonomik (njohës të çështjeve ekonomike), për të cilët Kosova ka nevojë, pasi kemi probleme të mëdha ekonomike dhe na duhen investime të jashtme, ato u mbushën me familjarë dhe militantë të tyre, e shumica prej tyre pa qenë njohës të asnjë fushe”, tha ai.
Krasniqi thotë se edhe pse kanë kaluar më shumë se 5 muaj prej formimit të institucioneve, Qeveria e Republikës së Kosovës dhe Ministri i Punëve të Jashtme, Hashim Thaçi, në këtë fushë të rëndësishme për shtetin e Kosovës, nuk ka lëvizur fare për t’i larguar pjesën më të madhe të këtyre diplomatëve skandalozë dhe jo të dobishëm, por vetëm po ecë rrugës së bashkëpartiakut të tij Enver Hoxhaj, i cili edhe është fajtori kryesor për shkatërrimin e diplomacisë kosovare!, ka deklaruar Krasniqi.
Ndryshe, janë shënuar disa skandale viteve të fundit në diplomacinë kosovare. Zëvendësambasadori kosovar në Kroaci, Urak Hamiti, në mediet kroate u shfaq rrugëve i dehur.
Ndërsa, në Ambasadën e Kosovës në Berlin, sekretarja e parë e Ambasadës, Fatmire Musliu, e cila është motra e deputetes së PDK-së, Ganimete Musliu, sulmoi fizikisht ambasadorin e atëhershëm, Vilson Mirdita. /tesheshi.com/
