Përkundër përpjekjeve të PS-së dhe PD-së për të miratuar ligjin e dekriminalizimit, të propozuar prej tyre në Kuvend, LSI ka marrë pozicionin në favor të konsensusit. Ashtu si kishte deklaruar edhe më herët kreu i LSI-së, Ilir Meta që duhet konsensus për të nxjerrë një draft për dekriminalizimin, nga propozimet e palëve, edhe sekretari i Përgjithshëm, Petrit Vasili konfirmon këtë qëndrim.
“Qëndrimi ynë për çështjen e dekriminalizimit mbetet i pandryshuar. Nisma për dekriminalizimin ka nevojë për konsensus të gjerë. 90% e drafteve të paraqitura për dekriminalizimin janë të njëtja. Për ato që nuk ka dakordësi, do i drejtohemi Komisionit të Venecias. Ai opinion do të jetë i padiskutueshëm për të gjitha palët. Po ecim drejt një procesi që ecën shpejt dhe i jep fund një debati të panevojshëm”, tha Vasili.
Drejtuesit e LSI-së janë investuar fort që të nënvizojnë qëndrimin e tyre për konsensus, pavarësisht se janë në koalicion qeverisës me partisë Socialiste. Lideri i kësaj të fundit dhe kryeministri i vendit, Edi Rama vuri në dukje më herët se janë të papranueshme disa “shpikje alla shqiptarçe”, në draftin e demokratëve.
Propozimi nga qeveria i një drafti alternativ me atë të opozitës futi në krizë komisionin e posaçëm parlamentar për dekriminalizimin. Së fundmi, po flitet se edhe socialistët, në pamundësi për të siguruar votat e LSI-së që duhen për ndryshimet kushtetuese që kërkon ligji për dekriminalizimin, kanë hyrë në bisedime me demokratët.
Gjithsesi, rezultatet e këtyre bisedimeve jozyrtare janë të dyshimta në mes të një atmosfere të nderë akuzash mes dy selive qendore që nga lidhjet me narkotrafikun e ato për personat me të shkuar kriminale. /tesheshi.com/
