DASH: Ja problemet e Shqipërisë dhe Kosovës për luftën ndaj terroristëve

Departamenti Amerikan i Shtetit publikoi raportin për terrorizmin për vitin 2014, thekson problemet e SHqipërisë e Kosovës në lidhje me luftën ndaj rrjetit global të rekrutimit të luftëtarëve të huaj për në Siri dhe Irak për të shkaur në radhët e ISIS.

Në raportin e DASH vlerësohet roli i Shqipërisë, si mbështetëse e fortë në përpjekjet kundër ISIS-it.

DASH vlerëson Shqipërinë për ndihmën e dhënë për luftëtarët kurdë Peshmerga në Veri të Irakut, të cilëve vendi ynë u ka dhuruar një sasi të madhe armësh dhe municioni, por thotë se Shqipëria është një vend burimi për luftëtarë të huaj terroristë që shkojnë në Siri dhe Irak.

Në raport thuhet se vendi ynë ka legjislacionin e nevojshëm që dënon aktet terroriste, financimin, transfertat e fondev, rekrutimin, trajnimin, nxitjen, krijimin dhe pjesëmarrjen në organizata terroriste, megjithatë shprehen rezerva në zbatimin e tyre.

“Ndërsa organet e rendit në Shqipëri punojnë aktivisht për të zbuluar dhe penguar aktivitete të paligjshme që lidhen me drogat dhe trafiqet, ato ende nuk kanë të njëjtën qasje agresive për të përballuar kërcënimet e mundshme terroriste. Policia njoftoi plane në tetor të vitit 2014 zgjerimin e njësisë antiterroriste.Trajnimi dhe pajisja e kësaj njësie do të ketë nevojë për përpjekje të konsiderueshme që ajo të arrijë nivelin e duhur të kapacitetit për të përballuar me efektivitet terrorizmin. Shqipëria nuk ka kapacitetet për të grumbulluar të dhëna biometrike veç atyre të kartave të identitetit dhe pasaportave që paraqiten në pikat e kalimit kufitar”, vlerëson raporti.

Raporti vëren se Shqipëria është duke marrë teknologji për të përpunuar shenjat e gishtave në të 26 pikat e kalimit kufitar. “Teknologjia e kontrollit në kufi do t’i lejojë autoritetet të grumbullojnë të dhëna gjatë hyrjeve dhe daljeve të udhëtarëve”, thuhet aty.

Megjithatë vihet re se korrupsioni i kombinuar me një sistem të dobët drejtësie, vazhdon të pengojë përpjekjet e Shqipërisë për zbatimin e ligjit.

DASH thotë se Shqipëria ka miratuar nisma kundër personave dhe organizatave të përfshira në lsitën e OKB-së si financuese të terrorizmit dhe ka ngritur një sistem parandalues të pastrimit të parave dhe financimit të terorizmit.

Raporti vlerëson bashkëpunimin e qeverisë me Komunitetin Mysliman. “Qeveria e Shqipërisë i jep ndihmë financiare Komuniteti Mysliman dhe bashkëpunon me të aktivisht për të diskutuar rreth radikalizimit dhe rekrutimit të individëve për synime terroriste”, thuhet në raport.

Kosova

Në raportin për terrorizmin për Kosovën, Departamenti Amerikan i Shtetit thotë se “kërcënimi i ekstremizmit të dhunshëm ka ardhur duke u rritur gradualisht, që pas konfliktit të vitit 1999, i ndihmuar pjesërisht edhe nga financimi i organizatave të huaja, që predikojnë ideologji ekstreme”.

Sipas këtij raporti, rreth 150–200 luftëtarë të huaj terroristë nga Kosova, kanë shkuar në Siri dhe Irak për të luftuar përkrah grupit Shtetit Islamik dhe Frontit al-Nusrah. Nga këta, rreth 20 janë vrarë.

Problematike vlerësohen ato që DASH i konsideron “grupe të dhunshme ekstremiste”, që përdorin aktivisht rrjetet sociale për të përhapur propagandën e tyre dhe për të rekrutuar njerëz. “Megjithatë, deri më tani në Kosovë nuk kanë ndodhur incidente terroriste”, vlerëson raporti.

Në raport vlerësohen gjithashtu përpjekjet e qeverisë së Kosovës, sidomos pas publikimit të videos ku tregohej Lavdërim Muhaxheri, duke i prerë kokën një të riu në Siri: “Kjo nxiti qeverinë të fillonte një operacion antiterrorist në shkallë të gjerë. Qeveria e Kosovës e mirëpret bashkëpunimin me Shtetet e Bashkuara për përpjekjet anti-terroriste. Shtetet e Bashkuara i kanë ndihmuar autoritetet vendase për disa raste aktive antiterroriste”.

Në vitin 2014, autoritetet e Kosovës arrestuan rreth 70 individë nën dyshimet për terrorizëm, rreth 40 prej të cilëve ishin luftëtarë të huaj, terroristë të kthyer. Qeveria e Kosovës ka filluar të shqyrtojë mënyrat për t’iu kundërvënë propagandës së Shtetit islamik, por nuk ka hedhur ende ndonjë hap konkret.

Sipas raportit, mungesa e anëtarësimit në shumë organizata rajonale, për shkak të bllokimit nga disa vende që nuk e njohin pavarësinë, është pengesë për Kosovën në luftën dhe përpjekjet e saj kundër terrorizmit.