Kryeministri grek, Aleksis Cipras lëshoi një seri kritikash e akuzash ndaj partisë së tij, Syriza në prag të një votimi tjetër të rëndësishëm në Parlament për reformat. Cipras sulmoi rebelët e Syriza-s duke i akuzuar ata se “fshihen pas sigurisë së firmës sime”.
Deputetët duhet të votojnë pro reformave që të nisin bisedimet për paketën e re të shpëtimit prej 86 miliardë eurosh. Vota pritet të kalojë me mbështetjen e deputetëve të Opozitës, mirëpo Cipras kërkon të shmangë një rebelim tjetër nga radhët e partisë së tij të radikalëve të majtë.
Rreth 32 deputetë të Syriza-s, përfshirë edhe ish-ministrin e Financave, Yanis Varoufakis votuan kundër raundit të parë të masave të kursimit, javën që shkoi. Gjashtë të tjerë abstenuan.
Reformat e reja parashikojnë ndryshime në sistemin bankar dhe në atë të Drejtësisë.
Rebelimi e ka reduktuar mbështetjen për Cipras brenda koalicionit në 123 deputetë, pak më shumë se minimumi prej 120 deputetësh për të mbajtur në këmbë Qeverinë.
Korrespondentët thonë se për një njeri që u detyrua të ndërmerrte një kthesë të fortë nga kreditorët, Aleksis Cipras mbetet jashtëzakonisht popullor.
Nëse ai thërret zgjedhje të parakohshme në muajt e afërt, që duket ende se është një opcion me shumë gjasa, ai mund të marrë sërish një fitore të madhe e të dalë prej tyre më i fortë./tesheshi/
