Një e ashtëquajtur UÇK për të dytën herë merr përsipër sulmin mbi godinën e qeverisë në Shkup, por mbetet enigmë e vërtetë se kush realisht qëndron prapa sulmit e se ç`është kjo UÇK që po del kaq papritur.
Komandant Kushtrimi, i nënshkruar në një komunikatën të publikuar në disa media, nëpërmjet së cilës merret përsipër sulmi i të premtes, nuk figuron në asnjërën nga shoqatat e dala nga lufta, thonë nga SHVL-UÇK të cilën e drejton Fazli Veliu dhe OVL-UÇK të cilën e drejton Besim Hoda.
Ata madje dyshojnë se bëhet fjalë për personazh fiktiv i cili përdoret për qëllime të caktuara. “Ne gjithmonë dalim me emër, dhe nuk fshihemi pas asnjë pseudonimi, sepse i urrejmë maskat. Gjithmonë kemi qenë transparent, ashtu siç kemi qenë gjatë luftës”, na tha Besim Hoda, kryetar i OVL-UÇK.
Në të dy sulmet e ndara, sipas policisë, godina qeveritare është sulmuar nga drejtimi i njëjtë, ndërsa informon se nuk ka patur dëme material, e as pasoja në njerëz. Dushimet se kjo mund të jetë rast i montuar lidhen me sulmin mbi godinën qeveritare disa muaj më parë, të cilën poashtu e mori përsipër UÇK, por komunikata mbante nënshkrim të falsifikuar, pasi nënshkrimi në komunikatë ishte identik me atë të guvernatorit të Bankës Evropiane, e cila mund të haset në kartmonedha të Euros.
Policia në Shkup, nuk ka dalë me detaje rreth sulmeve në fjalë, ndërsa ditë më parë, veterani i luftës Stojanco Angellov, i cili në vitin 2001 luftoi kundër UÇK-së, akuzoi se ekziston një plan monstruoz në Maqedoni për konflikt ndëretnik për çka tha se posedon informacion se u janë dhënë 2 milion euro shqiptarëve të cilët nuk kanë lidhje me UÇK-në, por siç thot ai disa kriminelëve nga rajoni i Likovës.
Dhe detyrë e tyre, sipas Angellov, ishte të paraqiten si UÇK dhe të bëjnë vrasjen e disa pjesëtarëve të policisë apo të ushtrisë dhe të shkaktojnë konfliktit ndëretnik.
Përgatiti: Bekim Laci –tesheshi.com
