Në përputhje me mandatin e EULEX-it, i cili parasheh monitorim të vazhdueshëm të rasteve të përzgjedhura që mbulojnë të gjithë zinxhirin e drejtësisë penale, Misioni europian, përmes Njësisë së tij për Monitorimin e Rasteve, është duke monitoruar nga afër 109 raste që përfshijnë serbët e Kosovës ose që mund të ndikojnë në marrëdhëniet ndërmjet komuniteteve.
EULEX-i tha për Tanjug se në këtë monitorim përfshihen personat që janë në paraburgim, si dhe rastet që kanë të bëjnë me krizën e targave të vitit 2022, procedurat e shpronësimit të tokave publike dhe private në veri të Kosovës, por edhe raste që kanë të bëjnë me dhunën e fundit në veri.
“Duke pasur parasysh praninë e rregullt të ekspertëve korrektues të EULEX-it në të gjitha institucionet korrektuese në Kosovë, ekspertët korrektues të EULEX-it kanë vizituar edhe të paraburgosurit M.M, D.O. dhe R.P. për të monitoruar kushtet e ndalimit të tyre. Asnjëri prej tyre nuk kishte asnjë kundërshtim për kushtet e paraburgimit dhe sjelljen e personelit të burgut”, tha Eulex.
Mbrojtja e të drejtave të njeriut
“Gjatë takimeve, të arrestuarit M.M. dhe D.O. kanë shfaqur shenja lëndimesh. EULEX-i është njoftuar se lëndimet e tyre janë regjistruar nga stafi mjekësor gjatë pranimit, në përputhje me procedurat përkatëse dhe se atyre iu është caktuar trajtimi mjekësor. Eksperti korrigjues i EULEX-it ka vizituar edhe N.O.”, thonë nga EULEX-i.
Theksohet se misioni i EULEX-it do të vazhdojë të raportojë për të gjitha rastet që janë pjesë e mandatit të EULEX-it.
Qëllimi i monitorimit të këtyre rasteve është të mbështesë institucionet e përzgjedhura të sundimit të ligjit, me qëllim të rritjes së efikasitetit, qëndrueshmërisë, multietnicitetit dhe përgjegjësive të tyre, pa ndërhyrje politike dhe në përputhje me standardet ndërkombëtare të të drejtave të njeriut dhe praktikat më të mira evropiane, tha EULEX. /tesheshi.com/
