Kryeqyteti i Vietnamit, Hanoi, është mbuluar nga smogu i rëndë javët e fundit, duke e bërë atë në krye të listës së qyteteve më të ndotura në botë, pasi qeveria njoftoi se do të promovonte më shumë automjete elektrike për të frenuar problemin.
Nivelet e grimcave të rrezikshme, të njohura si PM2.5, në Hanoi u matën në 266 mikrogram për metër kub herët këtë mëngjes – leximi më i lartë në listën e qyteteve më të ndotura, sipas AirVisual, i cili ofron informacion të pavarur mbi ndotjen globale të ajrit nëpërmjet një aplikacioni celular.
Vendi i Azisë Juglindore, një qendër rajonale prodhuese me një nga ekonomitë me rritjen më të shpejtë në Azi, ka raportuar për vite me radhë ndotje të rëndë të ajrit në qytetet e tij më të mëdha, veçanërisht në Hanoi.
Reja e dendur shkaktohet kryesisht nga problemi i trafikut, djegia e mbetjeve dhe nga aktivitetet industriale.
“Ne të moshuarit e përjetojmë shumë qartë kur vuajmë nga probleme të frymëmarrjes që shkaktojnë parehati”, thotë Lu Mich Duc, një 64-vjeçar. “Situata duket se është përkeqësuar kohët e fundit.”
Por ankohen edhe të rinjtë.
“Në fillim mendova se ishte mjegulla… por më pas kuptova se në fakt është pluhuri i imët që më kufizon shikimin dhe më bën të ndihem sikur nuk është e shëndetshme të marr frymë”, thotë studenti 21-vjeçar Nguyen Nih Huong.
Duke folur në një takim me zyrtarë të ministrisë së transportit dje, zëvendëskryeministri Tran Hong Ha bëri thirrje që të përshpejtohet kalimi në automjetet elektrike si pjesë e përpjekjeve për të reduktuar ndotjen, njoftoi media shtetërore.
Deri më tani, Hanoi ka vendosur një objektiv për të elektrizuar të paktën 50% të autobusëve dhe 100% të taksive deri në vitin 2030.
“Kjo është përgjegjësi e shtetit ndaj qytetarëve dhe duhet të ndërmerren veprime konkrete me kohë”, tha Ha, sipas gazetës Tien Phong. /tesheshi.com/
