Pas dyndjes së refugjatëve në Maqedoni, e pas daljes së gjendjes nga kontrolli në Gjevgjeli, Bullgaria ka vendosur të veprojë paraprakisht për t’i përforcuar kufijtë e saj.
Fillimisht do të dislokohen një numër i kufizuar trupash dhe mjetesh në katër pika kontrolli me Maqedoninë, gjithsej njëzet e pesë ushtarë e një numër mjetesh të lehta të blinduara.
Lajmin e bëri të njohur zëvendësshefi i operacioneve në ministrinë bullgare të Mbrojtjes, Nikolaj Ivanov, i cili tregoi dhe për qëllimin e kësaj lëvizjeje, “Detyra jonë do të jetë përforcimi i kontrolleve të vëna në zbatim tashmë nga policia kufitare.”
Por sipas zyrtarëve të ministrisë së Mbrojtjes, ushtarët do të jenë larg vijës kufitare e nuk do të kryejnë patrullime të përbashkëta me policinë kufitare. Gjithashtu nuk është në plan të dërgohen tanke e mjete të tjera të rënda.
Vëmendja e autoriteteve bullgare ka qenë e përqendruar deri më tani në vijën kufitare me Turqinë, në juglindje, ku ka patur një shtim të forcave policore me 1.000 trupa për pengimin e kalimit të refugjatëve.
Rumjana Baçvarova, ministrja bullgare e Punëve të Brendshme, e çmoi dje si relativisht të ulët rrezikun që vendi i saj të përballej me një vërshim të tillë të refugjatëve që u pa në Maqedoni.
“Çdokush e di se kufijtë bullgarë janë të ruajtur shumë mirë,” theksoi e sigurt ajo.
Refugjatët, që më së shumti vijnë nga Siria, po priren gjithnjë e më shumë të kalojnë nëpërmjet Ballkanit në vendet më të zhvilluara europiane, duke krijuar alarm në një sërë vendesh, përfshirë së fundi edhe Bullgarinë. /tesheshi.com/
