Sulmet e intensifikuara të ushtrisë siriane në Halep kanë vënë në shënjestër zonat e banuara dhe shkollat.
Së paku 13 civilë u vranë pasi ushtria siriane hodhi një bombë me vakuum në një shkollë fillore në qytetin e Halepit.
Mes të vrarëve pas bombardimit të shkollës Said el-Ensari ishin tre fëmijë dhe tre mësues, siç raportojnë zyrtarë të koalicionit opozitar sirian.
Forcat e regjimit sirian kanë goditur po ashtu një zonë ku bëhej pazar në rajonin Ma’adi të Halepit, duke lënë 25 të vdekur.
Sipas një njoftimi të zyrtarëve të koalicionit opozitar, të shumtë janë njerëzit që kanë humbur jetën pasi ushtria siriane hodhi bomba me vakuum në rrethinat Bab Nejrab, Duvejr ez-Zejtun, Balid, Xhubbe el-Kubbe, Bejada, Merxhe, Shejh Lutfi dhe Bashkoj.
Konflikti sirian ka hyrë në vitin e pestë, e pasojë e tij janë mijëra të vdekur e miliona të zhvendosur. Halepi ka qenë prej kohësh qendër e luftimeve mes forcave të regjimit dhe kryengritësve. Një prej qyteteve më tërheqës të Sirisë, Halepi i ngjan tanimë një gërmadhe, ndërsa lufta nuk duket të ketë të mbaruar. /tesheshi.com/
