Bill Gates e braktisi Harvardin pas vetëm tre semestrash në 1975 për të themeluar Microsoft-in, por prania e tij atje ishte e mjaftueshme për të lënë një gjurmë të fortë.
Profesori i matematikës së aplikuar, Harry Lewis, i cili ka dhënë mësim në universitet që nga vitet 1970, e kujton Gates si një student veçanërisht kurioz dhe të pjekur, me një prirje për të pyetur profesorët e tij dhe për të kërkuar vazhdimisht sfida.
Ai gjithmonë donte diçka më të vështirë. Ai po kërkonte një sfidë,” tha Lewis në një intervistë me Times të Londrës javën e kaluar. “Unë nuk u befasova kur ai u largua – do të doja të kisha investuar tek ai.”
Vendimi që e bëri atë miliarder
Gates u largua nga Harvard për të themeluar Microsoft, një startup në industrinë e softuerit të sapoformuar. Ky vendim e ktheu atë në miliarder në moshën 31-vjeçare. Sot, Microsoft ka një kapitalizim tregu prej afro 3.2 trilion dollarë, ndërsa pasuria personale e Gates vlerësohet në 108.7 miliardë dollarë, sipas Forbes.
Lewis llogariti se nëse do të kishte investuar 100 dollarë në Microsoft kur ai doli publik në 1986, vlera e investimit të tij sot do të ishte rreth 650,000 dollarë, sipas një analize të CNBC.
Zgjimi matematikor në Harvard
Si student në Harvard, Gates e gjeti veten të rrethuar nga kolegë studentë me aftësi superiore matematikore, gjë që ishte shkas që ai të… zgjohej. Në një intervistë për Times, ai zbuloi se kaloi orë të panumërta në laboratorin e kompjuterave të universitetit, ndërsa “pothuajse u vetëvra” duke ngarkuar orarin e tij me kurse shtesë.
“Ishte një tronditje. Ishte hera e parë që mendova: Oh, ka njerëz më të mirë se unë në matematikë,” tha ai. Megjithatë, pavarësisht dyshimeve të tij, Lewis theksoi në një intervistë të mëparshme se Gates mund të kishte ndjekur një karrierë si matematikan nëse do të kishte dashur.
Problemi i zgjidhur
Një moment që nxori në pah gjenialitetin matematikor të Gates ishte dita kur profesor Lewis u paraqiti studentëve të tij një problem të vështirë matematikor.
Dy ditë më vonë, Gates u kthye me një zgjidhje sipas një metode të psrmisuar. Zgjidhja e Gates u botua në një punim akademik në vitin 1979. “Problemi mbeti pothuajse në këtë gjendje për 30 vjet,” tha Lewis, derisa disa studiues më në fund përmirësuan metodën e Gates në një punim kërkimor të vitit 2008.
“Ata që e zgjidhën atë në 2008 nuk mund ta kishin bërë pa teknologjinë që vetë Gates ndihmoi në krijimin,” vuri në dukje Lewis. /tesheshi.com/
