LDK duket se ka përjashtuar krijimin e një qeverie gjithëpërfshirëse apo një koalicioni të mundshëm qeverisës me Vetëvendosjen.
Deklarata është bërë nga Avdullah Hoti, kandidat për kryeministër i LDK-së, sipas të cilit qeveria e re nuk mund të udhëhiqet nga njerëz që kanë kapur institucionet, por as nga njerëy që i kanë sulmuar ato.
“Qëndrimi i koalicionit të LDK-së është i qartë. Zgjedhjet e fundit kanë prodhuar një rezultat, ku PDK nuk mund të bëjë shumicën parlamentare. LDK nuk do të bëjë koalicion me PDK-në e as Vetëvendosjen, pavarësisht se kjo e fundit haptas e ka ftuar për koalicion LDK-në”, ka deklaruar Hoti për Express.
Ai shprehet se do të punojë për të bërë shumicën e nevojshme në mënyrë që vendin t´a udhëheqë koalicioni LAA.
”Vetëm koaliconi i LDK-së mund të formojë një shumicë të tillë. Ne do të angazhohemi që të formojmë shumicën e nevojshme për të udhëhequr vendin, një shumicë që siguron Qeveri proevropiane, me fokus të qartë në sundimin e rendit dhe ligjit, një qeverisje me duar të pastra. Është vetëm LDK që mund t’i ofrojë vendit një qeveri të tillë, duke u nisur nga përvoja institucionale që ka”, ka thënë ai.
Hoti përmes kësaj deklarate edhe pse mohon një koalicion të mundshëm me VV-në sikur e bën të qartë se do të pranonin një qeverisje me vetëvendosësit vetëm nëse partia e tij merr postin e kryeministrit. Por këtë opsion e ka rrëzuar VV e cila ka thënë se qeveria duhet të drejtohet nga ta në krye me Albin Kurtin pasi ky i fundit ka dalë politikani më i votuar në vend. /tesheshi.com/
