Shefja e diplomacisë së Bashkimit Evropian, Federica Mogherini tha se dënimi me vdekje i ish-presidentit egjiptian, Muhamed Mursi përbën një zhvillim shqetësues dhe Bashkimi Evropian pret që ky dënim të rishikohet nga Gjykata e Apelit.
”Edhe në vazhdën e ngjarjeve të tjera, Egjipti duhet të respektojë detyrimet ndërkombëtare, të garantojë stabilitetin dhe shtetin e së drejtës”, theksoi ajo.
Një gjykatë egjiptiane konfirmoi sot dënimin me vdekje që ishte dhënë një muaj më parë për ish-presidentin islamik, Muhamed Mursi, rrëzuar në vitin 2013 nga ushtria, për arratisjen masive të të dënuarve nga burgu gjatë revoltës së vitit 2011 dhe për planifikim të sulmeve.
Më herët, e njëjta gjykatë dënoi Mursin, i pari president i zgjedhur në mënyrë demokratike, me burgim të përjetshëm për spiunazh.
Më 21 mars, në gjykimin e parë ai ishte dënuar më 20 vjet burg për nxitje të dhunës kundër manifestuesve në vitin 2012. Dënimi me vdekje u konfirmua sot, pasi gjykata kishte marrë mendimin e pakundërshtueshëm të Myftiut të Egjiptit.
Verdiktet e këtyre tre proceseve të para, nga pesë që janë ngritur kundër Mursit, janë mbajtur në shkallën e parë dhe do të dërgohen në apel.
