Bashkimi Evropian ka njoftuar se ka rivendosur “praninë minimale” të stafit të tij në Kabul për të lehtësuar dërgimin e ndihmave humanitare në Afganistan, një vend i shkatërruar nga lufta ku talebanët morën pushtetin verën e kaluar, raporton AFP.
“Prania jonë minimale në Kabul nuk duhet të konsiderohet kurrsesi një njohje e regjimit në pushtet,” tha Peter Stano, një zëdhënës i shefit të politikës së jashtme të BE-së, Josep Borrell.
Ai tha se kjo iu tregua qartë talebanëve në pushtet.
Më herët, Ministria e Jashtme afgane njoftoi përmes zëdhënësve dhe Twitter-it se ambasada e BE-së me prani të përhershme në Kabul është rihapur, për herë të parë në pesë muaj.
Stano tha se BE-ja ka filluar të rivendosë praninë minimale të stafit ndërkombëtar të delegacionit të saj dhe qëllimi është të lehtësojë dërgimin e ndihmave humanitare dhe të monitorojë situatën humanitare.
Talibanët, ende pa njohje ndërkombëtare
Deri më tani, asnjë vend nuk e ka njohur qeverinë talebane. Komuniteti ndërkombëtar pret të shohë se si talebanët synojnë të sundojnë vendin.
Disa vende, duke përfshirë Pakistanin, Rusinë, Kinën, Turqinë, Emiratet e Bashkuara Arabe dhe Iranin, i mbajtën të hapura ambasadat e tyre në Kabul pas fitores së talebanëve në vend në mes të gushtit, por ato vende nuk e njohën qeverinë talebane.
Diplomatët perëndimorë kanë evakuuar personelin e tyre që nga gjysma e parë e vitit 2021, kur trupat amerikane filluan tërheqjen e tyre përfundimtare nga Afganistani. Tërheqja përfundoi në fund të gushtit me evakuimin kaotik të 120,000 njerëzve pasi talebanët pushtuan shpejt vendin. /tesheshi.com/
