BE, deklaratë mbi Asosacionin e pranuar nga Kurti e Vuçiç

Zëdhënësi i Bashkimit Evropian, Peter Stano, ka deklaruar se në takimin e fundit në Bruksel me liderët e Kosovës dhe Serbisë, përfaqësuesit e BE-së kanë paraqitur një propozim të “balancuar” për krijimin e një komuniteti të komunave me shumicë serbe në veri të Kosovës.

Në të njëjtën kohë, presidenti serb Aleksandar Vuçiç dhe kryeministri i Kosovës, Albin Kurti, treguan gatishmërinë e tyre “parimore” për ta pranuar atë propozim.

“Kjo do të çonte përpara procesin e normalizimit dhe do të zbuste rrezikun e përshkallëzimit dhe dhunës së re. Në takim palët treguan gatishmërinë e tyre në parim për ta pranuar këtë propozim evropian, por të dyja kishin parakushte që ishin të papranueshme për palën tjetër”, tha Stano.

Ai shtoi se pritet që kjo gatishmëri të çojë në realizim pa vonesa të mëtejshme, duke theksuar se “parakushtet nuk janë të pranueshme”.

Sipas tij, propozimi i BE-së nuk është bërë publik sepse përpjekjet diplomatike janë në vazhdim.

“Ne kurrë nuk i transmetojmë dokumentet zyrtare në diskutim, siç është praktikë e zakonshme në ndërmjetësimin ndërkombëtar. Është gjithashtu politika jonë e kahershme që të mos komentojmë për rrjedhjet e supozuara të informacionit ose raportet e mediave që pretendojnë se e kanë parë ose publikuar dokumentin”, tha ai.

Stano vuri në dukje se “të dyja palët do të vlerësohen në bazë të performancës së tyre individuale në zbatim”. /tesheshi.com/