Kryetari i PD, Lulzim Basha, e ka cilësuar rrëzimin e hetimit ndërkombëtar të CEZ, një “standard të zi” të vendosur nga mazhoranca aktuale.
Në një deklaratë për mediat, Basha tha se: “Qeveria ndaloi ligjin për ekspertizën e huaj sepse Edi Rama i trembet së vërtetës. Me aktin e djeshëm, Edi Rama provoi se është në krye të kësaj afere, së bashku me hipokrizinë e Ilir Metës. Këta që mbyllën me votë hetimin ndaj tyre, votuan burgun për fshatarin dhe për fermerin”.
Kreu i PD-së premtoi shfuqizimin e ligjit që burgos fshatarët dhe fermerët, si dhe të ligjit që sipas PD-së shpronëson për herë të dytë pronarët. Basha ka bërë apel për një pjesëmarrje sa më masive në protestën e 8 dhjetorit.
Kreu i demokratëve ka sulmuar ashpër edhe “Buxhetin 2016” të miratuar në Parlament, të cilin e ka cilësuar si “buxheti i torturës fizike dhe psikologjike”. /tesheshi.com/
