Kreu i PD-së, Lulzim Basha ka folur sot në Elbasan në një takim me gratë atje. Basha tha se Rama e ka përqendruar fushatën në një imazh të rrejshëm se do të bashkëqeverisë me PD-në pas zgjedhjeve.
“E keni parë që kërkon t’ua mbushë mendjen njerëzve se unë jam çun i mirë. Une nuk jam çun i mire, unë jam më i miri në këtë garë, me planin më të mirë dhe me vendosmerinë për ta nxjerrë Shqipërinë nga kriza! Janë të paktën tre investitorë shumë të mëdhenj amerikanë që do të investojnë në Shqipëri sa të vimë ne në pushtet”, tha Basha.
Gjithashtu Lulzim Basha iu përgjigj kryeministrit Edi Rama nga Elbasani, në lidhje me biznesin e vogël. Rama tha sot se taksat për biznesin e vogël janë zero. Mirëpo Basha e ka kujtuar se biznesi i vogël sot paguan taksa bashkiake të rritura, dhe për më tepër shumë gjoba që vendosin taksidarët hajdute.
“Sot ka thënë që taksa e biznesit të vogël është zero. Ishim ne dhe sipërmarrësit që luftuam për taksën e biznesit të vogël. Biznesi i vogël paguan tarifa dhe taksa vendore që kanë shkuar në qiell si taksa gjelbërimi, kanalizimi dhe gjoba. Ne do ti ndalojmë gjobat me pullat fiskale. Do vendosim kufirin 1.5% të xhiros vjetore sipas totalit të vetë deklarimit. Nëse taksidari terrorizon biznesin, do ta terrorizojmë ne me fuqinë e ligjit, e do ta çojmë në burg”, tha Basha./tesheshi.com/
