Kreu i partisë Demokratike, Lulzim Basha në fjalën përpara deputetëve të grupit parlamentar tha se Uashingtoni dhe Brukseli sot janë të skandalizuar nga karshillëku i kryeministrit, që kandidoi në zgjedhje njerëz të botës së krimit. Basha u fokusua tek cënimi, sipas tij, i standardeve të zgjedhjeve të 21 Qershorit, për të cilat tha se kanë mbetur në klasë, për shkak të arrogancës së kryeministrit Rama.
“Në zgjedhjet e fundit u regjistrua përdorimi më masiv i parave të pista për blerjen e votës. Zgjedhjet e 21 qershorit mbetën në klasë dhe kjo, jo vetëm në opinionin e opozitës, por edhe europarlamentarëve më të përkushtuar ndaj Shqipërisë”, tha Basha.
Sipas tij, tani është radha e shqiptarëve për të reaguar dhe marrë në dorë fatin e tyre dhe atë të vendit. Dekriminalizimi u cilësua prej tij hapi vendimtar.
“Dekriminalizimi është kushti dhe hapi i parë për një demokraci të re. Duam miratimin me konsensus të këtij projektligji, duke reflektuar në të punën e grupeve parlamentare”, ka thënë Basha. /tesheshi.com/
