Në pritje për t’iu përgjigjur akuzave te parreshtura që po i bëhen nga brenda PD-së, kreu i saj i “vetëngrirë”, Lulzim Basha i është rikthyer politikës së zakonshme duke denoncuar më së pari Erion Veliajn, e më pas Ramën
“Lulishtja pranë parkut të autobuzave ishte një nga investimet e mia si kryebashkiak në shërbim të qytetarëve të një prej zonave më të populluara të Tiranës. Erjon Veliaj, vegël e bindur në duart e oligarkisë që sundon vendin, e shkatërroi këto ditë lulishten dhe lejoi betonizimin e saj në favor të Besnik Sulajt, klientit të rëndësishëm të Edi Ramës.
Qytetarëve të revoltuar ata iu përgjigjën dje me dhunën e policisë. Edhe më i rëndë qe dhunimi i të drejtave të qytetarëve nga mediat kryesore të vendit të kontrolluara nga oligarkia, të cilat e fshehën protestën dhe dhunën e policisë.
Ndërkohë, Shqipëria po përjeton këto ditë mungesë dritash dhe uji sepse paratë publike u përdorën për të manipuluar votën dhe jo për të blerë energji për njerëzit.
Pushteti oligarkik herët a vonë degjeneron në pushtet të dhunës dhe të errësirës. Përballja me të është sot sfida kryesore e opozitës dhe e të gjithë njerëzve të ndershëm për të ndalur rrënimin e qyteteve, të ekonomisë dhe të ardhmes tonë”, shkruan Basha në FB.
Ky është reagimi i parë i tij, katër ditë pas shpalli “vetëngrirjen” si kryetar i PD-së, për t’u rifutur sërish në garën për kren e partisë, pas humbjes katastrofale në zgjedhje. /tesheshi.com/
