Avokati i drejtorit të Policisë për Mitrovicë, Nehat Thaçi, Sead Spahoviq, deklaroi se familja Milanoviq ka mohuar që Thaçi t’i ketë përzënë nga banesa e tyre ashtu siç pretendon prokuroria serbe.
Në një intervistë për Radio Kosovën Spahoviq tha se Nehat Thaçi duhet të lirohet sa më shpejt sepse nuk ka fakte qe e rendojnë atë për veprën penale me të cilën akuzohet.
Tre anëtarët e familjes Milanoviq me prejardhje nga Lipjani kanë mohuar në prokurorinë e Qarkut në Beograd që Nehat Thaçi t’i ketë përzënë nga banesa e tyre ashtu siç pretendon prokuroria serbe.
Avokati i drejtorit të Policisë për Mitrovicë, Nehat Thaçi, Sead Spahoviq, i ka thënë Radio Kosovës se nuk qëndron pretendimi i prokurorisë serbe.
Sipas tij viktimat e asaj ngjarjeje të cilën e përshkruan prokuroria gjatë dëshmimit nuk kanë pasur kurrfarë mëdyshjeje, por drejtpërdrejt kanë thënë se “Nuk është ai”. Spahoviq tha se ky është një fakt se Nehat Thaçi nuk e ka kryer veprën që i ngarkohet dhe ne menjëherë pas marrjes në pyetje të dëshmitarëve është kërkuar lirimi i tij.
“Pres që paraburgimi i Thaçit të ndërpritet ngase nuk ekziston asnjë arsye ligjore dhe asnjë provë që e ngarkon me çfarëdo vepre penale. Mendoj se jo vetëm që ti ndërpritet paraburgimi por që prokurori në bazë të provave që posedon është dashur që të tërhiqet nga ndjekja penale dhe jo ta mbajë atë në ndjekje penale. Është evidente që prokurori nuk posedon asnjë provë që ta vazhdoj ndjekjen penale më tutje”, ka thënë Spahoviq.
Nehat Thaçi ishte arrestuar me 29 shtator derisa po kalonte transit nëpër Serbi, nën dyshimin për veprën penale për terrorizëm gjatë vitit 1999. Afati i paraburgimit të Thaçit skadon me 28 tetor. /tesheshi.com/
