Dyshimet e liderit të LSDM-së Zoran Zaev, i cili ditë më parë tha se të dënuarit shqiptarë për rastin Monstra janë të pafajshëm, për çka tha se posedon audio-materiale të përgjuara, ka bërë që të reagojë avokati mbrojtës, Naser Raufi.
Duke folur për mbrojtjen e të dënuarve, Raufi tha se shpreson që Zaev ta bëjë publikimin e audio-inçizimeve para datës 6 korrik, për kur është caktuar seanca dëgjimore në gjykatën e Apelit:
“Jam i bindur se Zaev do t`i publikojë përgjimet deri në atë datë, sepse ashtu do të vërtetojmë pohimet tona si avokat, të cilat i kemi përsëritur shumë herë që nga fillimi i procesit gjygjësor, se dënimet janë bërë në bazë të dyshimeve të paqëndrueshme”, deklaroi Raufi.
Më herët, në intervistë për gazetën gjermane “Die Zeit”, Zaev kishte thënë se bazuar në materialet të cilat i posedon si prova, ekzistojnë dyshime serioze për rastin “Monstra” dhe se të dënuarit janë të pafajshëm.
Më vonë, Zaev u orvat të reterojë nga deklarata duke thënë se e njëjta është keqintepretim i gazetës, por sot gazetari gjerman Ultrih Ladurner, ka thënë se posedon edhe audio-material dhe shënime nga biseda, duke pretenduar se gjithçka që është shkruar ka qenë ajo që ka thënë Zaev. /tesheshi.com/
