Një gol i shkëlqyer i Saul-it në minutën e 11-të i dha fitoren Atletikos së Madridit ndaj Bajernit të Mynihut në takimin e parë gjysmëfinal të Champions League-s.
Një lojë tipike e spanjollëve të Diego Simeones, që ia dolën t’u rezistojnë dhe sulmeve të njëpasnjëshme të gjermanëve, veçanërisht në 45 minutat e dyta.
Vendasit në “Vicente Calderon” e nisën vrullshëm lojën, duke e gjetur shpejt golin, pas një realizimi spektakolar të Saul-it. Do të pasonte më tutje një barazpeshë, që do të fillonte të anonte nga udhëtuesit me kalimin e minutave.
Dhe ndryshe nga ç’ngjau në pjesën e parë, lojtarët e Atletikos u tërhoqën në thellësi të fushës së tyre në
pjesën e dytë, duke sjellë një dominim të plotë të miqve. Oblak, portieri slloven i vendasve, bëri një seri pritjesh, por qe me fat kur Alaba goditi traversën pas një predhe nga një distancë shumë e largët.
Vetëm në të 75-ën minutë do të vinte rasti i parë dhe më drithërues për Atletikon në këtë pjesë të dytë. Torres godet me të jashtmen e këmbës së djathtë, dhe topi i gjuajtur mjeshtërisht përplaset në shtyllë. Atletikoja humbet mundësinë për të thelluar shifrat.
Rezultati 1-0 për vendasit nuk do të ndryshonte gjer në fund të ndeshjes, duke u dhënë atyre një avantazh për takimin e dytë.
“Pjesa e parë ishte shumë afër asaj që deshëm. Ata ishin më mirë në pjesën e dytë…, por ne u mbrojtëm mirë. Ata do të luajnë javën e ardhshme në shtëpi me mbështetësit prapa tyre. Ka për të qenë një ndeshje pak a shumë si sot.” Kjo është ajo çfarë deklaroi Diego Simeone pas sfidës.
Guardiola do të shprehej i pakënaqur për lojën e të tijve: “Goli i tyre është i shkëlqyer, por është gabimi ynë. Nuk jam i kënaqur me mënyrën se si luajtëm. Një ndeshje e mirë përgjithësisht, por e nisëm keq. Goli ishte pasojë e tonit tonë të ulët të lojës.”
Takimi i kthimit do të zhvillohet në “Allianz Arena” të martën që vjen, më 3 maj. /tesheshi.com/
