Topçinjtë e nisën mirë këtë sezon të Premier League-s, me shpresën se do të mund ta fitonin përsëri kampionatin pas vitesh të tëra pritjeje. Por rezultatet e dobëta të njëpasnjëshme në muajt e fundit e kanë zbritur Arsenalin në vend të katërt në klasifikim.
Skuadra e drejtuar nga Venger ka fituar vetëm gjashtë nga 16 takimet e fundit në kampionat, e eliminuar shpejt gjithashtu nga Champions League dhe nga FA Cup-i.
“Ne e humbëm kampionatin në shtëpi, ndaj ekipeve më të dobëta, por kemi luajtur në fushën tonë në një atmosferë shumë të rëndë,” ka thënë tekniku francez.
Humbja 1-2 më 2 mars ndaj Suonsi Sitit në “Emirates Stadium”, barazimi 1-1 më 17 prill po në shtëpi ndaj Kristëll Pallasit, e një tjetër barazim pa gola para pesë ditësh ndaj Sandërlendit, i dhanë fund shpresës së Arsenalit për të fituar kampionatin.
“Ky klub ka vlera të veçanta, dhe një që unë kam provuar për vite me radhë është të qëndruarit së bashku dhe mbështetja e ekipit. Nuk ka sukses pa këtë,” do të shtonte Arsene Venger.
Arsenali nuk e fiton Premier League-n prej 12 vitesh, që nga sezoni 2003-2004. Dikur një hero i topçinjve, sot Arsene Venger ka kundër një pjesë të mirë të tifozëve të skuadrës. Atij i është kërkuar prej kohësh të tërhiqet, diçka që Venger nuk ka pranuar ta bëjë. /tesheshi.com/
