Në orët e hershme të mëngjesit ka filluar një aksion i madh policorë në paralagjen Vaganicë të Mitrovicës. Aksioni i sotëm policor i filluar rreth orës 6 të mëngjesit, ka futur në pranga nëntë persona.
Në mesin e tyre ka edhe shtetas që dyshohet të jenë nga Siria.
Të arrestuarit nga policia e Kosovës, të cilët ishin shtetas sirian nuk kanë të bëjnë me aksionin e policisë për konfiskimin e armëve, por me qëndrim ilegal në Kosovë.
Sirianët u shoqëruan gjatë mëngjesit të sotëm në stacionin e policisë. Të njëjtëve u është caktuar masa e ndalimit.
Në këtë aksion që ka përfunduar rreth orës 9 të mëngjesit policia ka gjetur një predhë dore dhe municion.
Zëdhënësi i PK-së për Rajonin e Mitrovicës, Avni Zahiti ka treguar për “Zërin” se qëllimi i aksionit të Policisë ishte kërkimi i armëmbajtjeve pa leje në një shtëpi.
“Aty janë gjetur një raketë hedhës krahu, një sasi municioni të kalibrit të vogël dhe është marrë pronari i shtëpisë si i dyshuar. Njëkohësisht në atë shtëpi janë hasur nëntë persona, shtetas të huaj të cilët kanë qëndruar aty”, ka thënë ai.
