Është arrestuar në Gjermani Daniele Klette, një grua famëkeqe, e trajtuar si terroriste. Ajo i përliste grupit ekstremist të majtë “Fraksioni i Ushtrisë së Kuqe”, i njohur me shkurtesën RAF. E kërkuara me dekada u kap në Berlin, njoftoi zyra e prokurorit publik në Verdun në Saksoninë e Ulët.
Sipas informacioneve të agjencisë së lajmeve DPA, Klette u arrestua mbrëmjen e së hënës (26 shkurt) nga policia e Saksonisë së Poshtme në një apartament në lagjen Kreuzberg të Berlinit. Aktualisht banesa në pallatin shtatëkatësh po kqyret nga ekspertët mjeko-ligjorë.
Para arrestimit, Prokuroria e Shtetit shpalli në kërkim 65-vjeçaren dhe kërkoi ndihmë nga qytetarët. Që nga viti 2015, Prokuroria e Shtetit ka qenë në kërkim të Daniele Klette, si dhe dy ish-anëtarë të tjerë të RAF, Ernst-Volker Staub dhe Burkhard Garweg.
Autoritetet akuzojnë Klette, Staub dhe Garëeg për tentativë vrasjeje dhe një seri grabitjesh të rënda të kryera midis viteve 1999 dhe 2016 në Saksoninë e Poshtme dhe North Rhine-Westphalia. Avokatura e shtetit supozon se sulmet nuk kanë qenë të motivuara politikisht, pra se treshja, e cila ka më shumë se 30 vjet në arrati, financoi jetën e tyre në nëntokë me grabitje.
Për më shumë se dy dekada, organizata terroriste RAF luftoi dhunshëm kundër “sistemit imperialist” të pretenduar të Republikës Federale të Gjermanisë. Nga viti 1971 deri në 1993, terroristët vranë 34 njerëz, duke përfshirë njerëz nga bota e politikës, drejtësisë dhe biznesit, si kryeprokurorin e shtetit Siegfried Buback dhe presidentin e shoqatës së punëdhënësve Hanns Martin Schleyer. Më shumë se 200 persona u plagosën nga aksionet e grupit terrorist.
Klette, Staub dhe Garweg i përkasin të ashtuquajturës “gjenerata e tretë” e RAF. Përfaqësuesit e asaj gjenerate dyshohet se vranë CEO-n e atëhershëm të Deutsche Bank, Alfred Herrhausen dhe ushtruesin e detyrës së drejtorit të Agjencisë së Privatizimit të ish-RDGJ-së, Detlev Karsten Rohwedder.
Sulmi i fundit nga RAF ndodhi në mars 1993 me një akt shpërthyes në kantierin e ndërtimit të burgut Weiterstadt. Më shumë se 200 kilogramë eksploziv shkatërruan tre objekte akomoduese dhe krahun administrativ të atij institucioni. Fatmirësisht nuk kishte të lënduar, ndërsa dëmi material u llogarit nga 80 deri në 90 milionë marka gjermane.
Në prill 1998, RAF njoftoi se grupi po shpërbëhej. /tesheshi.com/
