Avioni i qeverisë serbe, i modelit “Falcon”, me të cilin Presidenti i Serbisë, Tomisllav Nikoliç duhej të udhëtonte për vizitë zyrtare në Vatikan, ku pritej të takonte Papa Françeskun, për shkak të defektit të motorit …
Avioni i qeverisë serbe, i modelit “Falcon”, me të cilin Presidenti i Serbisë, Tomisllav Nikoliç duhej të udhëtonte për vizitë zyrtare në Vatikan, ku pritej të takonte Papa Françeskun, për shkak të defektit të motorit, u kthye në Beograd.
Për shkak të këtij incidenti, vizita e Nikoliçit në Vatikan, u anulua, ndërsa këshilltarja e presidentit serb, Stanislava Pak, ka konfirmuar për mediat beogradase se vizita është “anuluar deri në një njoftim të radhës, derisa nuk konfirmohen detajet e vizitës së re”, dhe shtoi se Kryesia shpreson se kjo do të ndodh së shpejti.
Presidenti serb ishte nisur në vizitë zyrtare një-ditore në Vatikan, ku ishte planifikuar të takohet me Papa Françeskun dhe me sekretarin e Shtetit të Vatikanit, Kardinalin Pietro Parolin, sekretarin për Marrëdhënie me Shtetet arqipeshkvin, Paul Gallagher dhe shefin e Departamentit për Ballkanin Perëndimor, Imzot Henry Jakodzinski.
Në prag të vizitës së tij në Vatikan, Nikoliç ka biseduar me patriarkun Irinej dhe duhej që Papa Françeskut ti përcillte edhe qëndrimet e caktuara të Kishës Ortodokse Serbe, të cilat janë me interes të përbashkët.
Defekti ndodhi në motorin e aeroplanit të qeverisë, i cili ishte prodhuar në 1981, ndërsa incidenti i sotëm është i fundit në serinë e incidenteve me këtë avion qeveritar. Për shkak të defekteve të ndryshme në këtë avion, si dhe aeroplanin e dytë në pronësi të Qeverisë së Serbisë, të prodhuar në 1991, zyrtarët serbë kanë pasur vazhdimisht probleme.
