Mehmet Akif Ersoit është një shqiptar me origjinë nga Istogu i Pejës. Ai është autori i himnit kombëtar të Turqisë që vendos si i tillë më 12 mars 1921.
Ankaraja zyrtare do ta përkujtojë autorin e himnit të Republikës Turke me një simpozium të posaçëm që zhvillohet në Tiranë për dy ditë.
Për këtë eveniment në Shqipëri ka mbërritur edhe ministri i Shtetit dhe Marrëdhëniet me Parlamentin të Turqisë, Ahmet Gundogdu, si dhe një grup deputetësh.
Gundogdu dhe deputetët janë pritur nga Kreu i Kuvendit të Shqipërisë, Ilir Meta, i cili deklaroi se do të vizitojë së shpejti Ankaranë, por edhe vlerësoi Turqinë për pritjen e refugjatëve nga Lindja e Mesme.
“Kemi folur jo pak edhe për krizën në Siri dhe sidomos për krizën e refugjatëve, ku dua të vlerësoj edhe një herë Turqinë për një përpjekje gjigante që po realizon për të ndihmuar miliona refugjatë të cilët po përpiqen të shpëtojnë nga lufta”, deklaroi Meta.
Ndërsa, Gundogdu u shpreh se”Kjo është një vizitë që bëhet për të forcuar marrëdhëniet vëllazërore midis dy vendeve tona. Vëllazëria forcohet duke vizituar njëri-tjetrin dhe delegacioni i fundit i shtetit tonë ka qenë Kryetari i Parlamentit të Turqisë që ka vizituar Shqipërisë, dhe tani e ftuam Ilir Metën që të vizitojë shtetin tonë. Dëshirojmë që të gjitha marrëdhëniet tona ekonomike, sociale, politike, arsimore të forcohen, por aq më tepër marrëdhëniet midis dy parlamenteve tona të forcohen sa më shumë”.
/tesheshi.com/
