Takimet e ministrit të Jashtëm grek, Nikos Kotzias në Prishtinë, e deklarata e tij se Athina po merr seriozisht në konsideratë njohjen e Kosovës, bënë që Beogradi të reagojë me zemërim, duke lënë të kuptohej për një “tradhti” nga aleati helenik.
Këto deklarata e kundërdeklarata janë në fokus të një shkrimi të analistit grek Stavros Tzimas në një shkrim të botuar nga gazeta “Kathimerini”.
“Udhëheqësit serbë duhet të kuptojnë se nuk mund të drejtojnë gishtin nga grekët me të njëjtin ton si t’u drejtohen bashkëpatriotëve të tyre në Bosnje dhe Kosovë. Koha e politikës së Millosheviçit nuk ka më vend në realitetin e ri të Ballkanit”, shkruan analisti. Ai kujton edhe se Athina pagoi çmim të shtrenjtë për qëndrimin e saj pro Serbisë gjatë luftërave në ish-Jugosllavi.
“Në këmbim të kësaj morëm si shpërblim njohjen e Maqedonisë me emrin e saj kushtetues nga ana e Beogradit”, shkruan Tzimas.
Analisti grek shton se vetë Serbia ‘de facto’ e ka njohur shtetin e Kosovës, duke iu referuar dialogut në Bruksel. Ligji i diplomacisë, sipas tij, mëson se nuk ka miq, as armiq të përjetshëm; ka interesa të përjetshme. /tesheshi/
