Ndërkohë që nësër pritet mbledhja e kryesisë së PS-së, PD-së dhe e LSI-së për të përcaktuar kandidatët për kretët e 61 bashkive të vendit, deputeti socialist Ben Blushi ka kritikuar sërish, Kryeministrin Edi Rama, pas mbledhjes së grupit parlamentar socialist.
Deputetët e PS-së kanë zhvilluar sot mbledhjen e radhës por me mungesën e Kryeministrit Edi Rama, i cili në fakt kishte njoftuar se do të ishte present në takim. Madje Garda e Republikës ka ndërmarrë edhe masat e rutinës për sigurinë.
Mbledhja me dyer të mbyllura nisi në orën 14:00 dhe përfundoi në 14:25 të mesditës. Në fokus të diskutimeve ka qenë përzgjedhja e kandidatëve për zgjedhjet lokale të 21 qershorit dhe ecurinë e negociatave me aleatët. Kjo është një javë vendimtare, pasi pritet të bëhet dhe prezantimi i kandidatëve për 61 bashkitë e vendit.
Dilemat kryesore mbeten për kryeqytetin, bashkinë e Vlorës gjithashtu, por dhe bashki të tjera të vendit.
Edhe pse i rezervuar, deputeti socilist Ben Blushi ka kritikuar kryetarin e tij, Edi Rama, për mënyrën si po vepron në përzgjedhjen e kandidatit të shumicës për Bashkinë e Tiranës.
Blushi e cilësoi procesin si jo transparent: “Ishim mbledhur për arsye të tjera. Duhet të kishin dalë emrat, shumë vonë është. Duhet të kishin pasur më shumë transparencë, këto janë kandidatët e një njeriu deri tani, nuk janë të PS për fat të keq deri tani, prandaj nuk dua të flas më shumë”.
Deklaratat Ben Blushi i bëri pas mbledhjes së grupit parlamentar socialist, që u drejtua nga kreu i grupit, Gramoz Ruçi, edhe pse në nisje të tij Garda e Republikës u duk se po përgatitej edhe për praninë e kryesocilistit Edi Rama. Mësohet se tema e nxehtë e përzgjedhjes së kandidatëve për bashkinë e Tiranës është shmangur në këtë mbledhje të sotme.
