Partia për Drejtësi dhe Zhvillim, apo, ndryshe, AKP-ja (Adalet ve Kalkınma Partisi), që mbizotëron prej më tepër se një dekade skenën politike turke, ka zhvilluar sot kongresin e pestë të saj.
Kongresi rizgjodhi si kryetar të partisë kryeministrin Ahmet Davutogllu, i cili mori 1353 vota në përfundim të zgjedhjeve.
Rizgjedhja e Davutogllusë ishte e pritshme, pasi ai qe kandidati i vetëm në garën për të përcaktuar drejtuesin e ri të partisë.
Votimi dërrmues në favor të Davutogllusë tregoi për mbështetjen e madhe që ai gëzon mes anëtarëve të partisë së tij, edhe pse në zgjedhjet e fundit AKP-ja dështoi të arrinte një fitore që do t’i mundësonte ta qeveriste e vetme vendin.
Në prag të zgjedhjeve të parakohshme, që do të mbahen në fillim të nëntorit, e mes një situate kaotike në vend për shkak të rinisjes së akteve terroriste të kryera nga PKK-ja, Ahmet Davutogllu e vuri theksin në fjalën e tij te domosdoshmëria e qeverisjes së vendit nga një parti e vetme.
Ky ishte kongresi i parë i AKP-së i zhvilluar pa pjesëmarrjen e Rexhep Tajjip Erdoganit. Davutogllu e mori drejtimin e partisë në gushtin e vitit të shkuar, pasi Erdogani u zgjodh nga populli president i vendit.
AKP-ja pretendon sërish të fitojë shumicën në zgjedhjet e nëntorit, për ta qeverisur e vetme vendin, siç ka bërë në vitet e shkuara. Në listat e saj të kandidatëve për deputetë pritet të ketë ndryshime cilësore, pasi një pjesë e figurave historike të partisë do ta kenë tashmë të mundur të kandidojnë.
Nëse dhe zgjedhjet e parakohshme nuk sjellin ndryshim të numrave në parlament, qeverisja me koalicion do të jetë alternativa e vetme. /tesheshi.com/
