Misioni i radhës i FMN në Tiranë po kalon në negociata po aq të vështira si ai i qershorit kur nuk u firmos rishikimi i marrëveshjes dhe u bllokua kësti i kredisë 26 milionë euro. Gjithçka përqëndrohet tek taksat, një hap që qeveria e ka gati të pamundur ta ndërmarrë. Pas lëvizjeve të fundit politike në kryeqytet, situata pritet të zbardhet të hënën kur misioni i FMN dhe drejtuesit e lartë finacave të vendit do të dalin në konferencë shtypi.
Përfaqësuesit e qeverisë shqiptare po zhvillojnë seanca shumë të vështira me misionin e radhës të FMN-së. Sipas burimeve të afërta në ministrinë e Financave, përfaqësuesit e Fondit janë shprehur krejt të pakënaqur me performancën fiskale e cila mbetet e dobët edhe pas aksionit anti-informalitet.
Në një situatë të tillë kur nuk po garantohet realizimi i planit të të ardhurave misioni ka rekomanduar rritje të mëtejshme të taksave. Por autoritetet shqiptare janë të vendosura të mos e marrin në konsideratë opsionin e rritjes së taksave. Kjo për faktin se kjo do të kishte një kosto ndoshta të papërballueshme për qeverinë. Aq më tepër që aleati kryesor i maxhorancës socialiste ka deklaruar publikisht se nuk do të japë vota për rritje të taksave.
Aq e ndezur është situata e këtyre negociatave, saqë kreu i qeverisë Edi Rama pati një takim të vecantë me kreun e Kuvendit dhe të LSI-së Ilir Meta, pas të cilit u deklarua se u fol ekskluzivisht për tema ekonomike. Sipas burimeve të mësipërme, autoritetet shqiptare kanë në tryezë edhe opsionin e ndërprerjes së marrëdhënieve me Fondin Monetar Ndërkombëtar ndonëse kjo do të ishte goditje e rëndë për imazhin e vendit.
Ky mision i FMN që vijon prej një jave po zhvillohet në një kohë që qeveria është në kulmin e punës për hartimin e buxhetit dhe paketës fiskale 2016. Ai pason misionin e vështirë të muajit qershor nga ku për shkak të defiçitit në të ardhurat buxhetore nuk u firmos rishikimi i pestë i marrëveshjes me FMN dhe për pasojë u bllokua edhe kësti i radhës prej 26 milionë euro.
/tesheshi.com/
