Acarohet situata në Azi dhe i gjithë rajoni rikthehet në periudhën e “Luftës së Ftohtë”. Kina në njërën anë dhe SHBA dhe Japonia në anën tjetër, janë përballur me akuza dhe kundërakuza të forta.
Pekini po përgatit një ceremoni gjigande me rastin e 70 vjetorit të mbarimit të Luftës së Dytë Botërore, të ngjashme me atë që zhvilloi Putin më 9 maj në Moskë.
Mirëpo ky jubile po shikohet gjithnjë e më shumë si rritje e orekseve ekspansioniste të Kinës.
SHBA-Kore
Shtetet e Bashkuara të Amerikës dhe Kina vazhdojnë acarimin mes tyre pas ngjarjeve në detin e Kinës Jugore ku dy shtetet e mëdha u përplasën për dy ishuj të vegjël.
SHBA-ja i kërkoi aleates së saj; Koresë së Jugut të mos marrë pjesë në aktivitetet përkujtimore të Kinës me rastin e përkujtimit të 70-vjetorit të përfundimit të Luftës së Dytë Botërore. Agjencia japoneze e lajmeve “Kyodo” citoi një zyrtar amerikanë të ketë thënë se administrata e Obamës i ka kërkuar presidentes së Koresë së Jugut Park Geun-hye të mos marrë pjesë në aktivitetet përkujtimore më 3 shtator në Pekin.
Është raportuar se Kina ka ftuar shumë krerë shtetesh, përfshi të Koresë së Veriut e të Jugut, të vendeve europiane dhe të Japonisë për të marrë pjesë në aktivitetet përkujtimore.
SHBA-ja i sheh aktivitetet përkujtimore të Kinës si një strategji për shtimin e ndikimit të Kinës në Azi dhe në botë.
Kinë-Japoni
Ambasadori i Kinës në Japoni i bëri thirrje kryeministrit japonez Shinzo Abe të përballet me historinë, teksa kryeministri pritet të bëjë një deklaratë për 70-vjetorin e përfundimit të Luftës së Dytë Botërore.
Kryeministri japonez njoftoi se deklarata do të lëshohet me vendim kabineti. Ambasadori kinez në Japoni Cheng Guoping tha se Kina, së bashku me vendet e tjera të pushtuara nga Japonia gjatë luftës, janë të shqetësuara lidhur me përmbajtjet e fjalimit të ardhshëm të liderit japonez.
Koreja e Jugut, banorët e të cilës ishin viktima të krimeve të luftës të kryera nga ushtria japoneze, i kanë kërkuar vazhdimisht qeverive të njëpasnjëshme të Japonisë të përballen me të kaluarën ushtarake të vendit.
Marrëdhëniet mes Japonisë dhe fqinjëve të saj aziatikë kanë qenë të acaruara për shkak të përpjekjeve të disa politikanëve japonezë për të mohuar krimet e së kaluarës.
/tesheshi.com
