Ende pa nisur nga puna Task Forcë e krijuar nga Prokuroria e Krimeve të Rënda për Luftën ndaj korrupsionit, tre raste të abuzimit me paratë publike janë zbuluar vetëm gjatë ditës së premte, dy prej të cilëve ish-kryetarë bashkie.
Një rast është denocuar nga specialistët kundër Krimit Ekonomik. Ata nisën procedimin penal në gjendje të lirë, për ish-kryetarin e Bashkisë Krujë, shtetasit Shkëlzen Hoxha 39 vjeç, ish-vartësit së tij, Indrit Fida, dhe shtetasin Xhuma Rroshi nga Kruja.
Akuza ndaj tyre është “shpërdorim i fondeve të publike” për ndërtimin e një objekti, investim i Ministrisë së Brendshme, i cili nga verifikimet rezultoi i papërfunduar, ndërkohë shuma e përcaktuar për ndërtimin e tij i është kaluar në llogari firmës, duke shkelur kontratën.
Rasti i dytë i ndjekjes penale për abuzim me fondet është ai ish-kryetarit të Bashkisë Patos. KLSH pas auditimit të kryer ka zbuluar një dëm ekonomik mbi 8.3 milionë lekë ose 60 mijë euro, dhe të ardhura të munguara në buxhetin e shtetit në mbi 25.8 milionë lekë ose mbi 180 mijë euro. Shkeljet janë konstatuar në prokurimet dhe rregullat e zbatimit të tyre.
Ndërkohë, rasti i tretë i zyrtarit të korruptuar që ka rënë në pranga është ai i ish-drejtorit të hipotekës në Elbasan, Altin Ago. Ky i fundit, njëherësh kandidat në listën e PS-së për deputet ( 13-ti në listë) u arrestua për falsifikim të dokumentave zyrtare dhe vjedhje të pronave të disa personave.
Duket se Task Forcë e Krijuar nga Prokuroria e Krimeve të Rënda, me 6 prokurorë shqiptarë, ku do të asistojë një prokuror amerikan dhe disa nga BE, do të kenë shumë punë me dosjet e zyrtarëve të korruptuar, kur vetëm në një ditë tre ish-zyrtarë janë paditur. /tesheshi.com/
