Nga Ylli Pata
Ilir Meta ka humbur tre nga betejat që investoi më shumë këtë fushatë elektorale: Lezhën, Pogradecin dhe Vorën, dhe nuk ka performancë të mirë në Berat, një nga bastionet e majta, ku tashmë me të tjerat dukej se fitorja nuk do të ishte problem.
Në ambjentet e LSI-së ka shpërthyer thirrja se “këtu ka tradhëti dhe ajo ka ardhur nga PS-ja”. Dhe në këtë kontekst, ridel në skenë prishja me Ramën në vitin 2007, kur LSI-ja u largua nga koalicioni me PS-ja dhe avash-avash u bashkua me PD-në.
Në shkurtin e vitit 2009, përpara zgjedhjeve parlamentare të atij viti LSI-ja u bashkua me PD-në për t’i rrëzuar Edi Ramës, atëherë kryebashkiak, buxhetin vjetor. Nga komentatorë që përcjellin nëpër panele televizionesh humoret e diversionet e selisë blu po përçohet fuqishëm kjo tezë, duke yshtur një “vëlla-vrasje” apo “lufte sektare” PS-LSI. Por a do të ndodhë një gjë e tillë?!
Ilir Meta, nuk ka shumë arsye apo dhe komoditet ta bëjë këtë, për disa shkaqe.
LSI-ja vërtetë ka humbur Vorën, Lezhën apo Pogradecin, por pikërisht kjo humbje i ka dhënë një kartë Metës që në ndarjen e mandateve për deputetë në vitin 2017-s, LSI-ja të ketë ndoshta të gjithë emrat e sigurtë në krye të listës, ndërkohë kur elektorati do të jetë nën presion që nëse refuzon, LSI humb pushtetin. Meta ka fituar disa bashki të tjera shumë të rëndësishme, si Gjirokastra, Kuçova, Bulqiza, Skrapari, Cërriku etj, që do t’i japin një mundësi më shumë për të mos e ndarë “tortën” me PS sipas parimit proporcional.
Metës i duhet të mendohet shumë para të nisë një përplasje me Edi Ramën e fuqizuar së tepërmi si Kryeministër. Nuk janë kushtet e vitit 2007-s dhe as konteksti i atëhershëm. Megjithatë LSI-ja pret votat e proporcionalit, dhe në bazë të tyre do të lëvizë në fushë.
Ka qenë vetë Ilir Meta që ka mbushur opinionin me një frymë se LSI-ja do të rritet vazhdimisht, madje gjithë këta muaj u fol për të famshmen “betejë për vendin e dytë”. Pikërisht ky ishte bumerangu politik i LSI-së, duke ushqyer legjendën se do të fryhej e fryhej, derisa në barkun e madh të kësaj partie të vogël të futeshin të gjithë, i cili do të zinte shumë e shumë vetë… /tesheshi.com/
