Pas marrëveshjes së Turqisë me SHBA-të për të hapur bazën ajrore të Inxhirlikut në Adana për forcat e koalicionit të udhëhequr nga amerikanët, pritet që gjatë kësaj jave të dislokohen atje rreth 300 trupa, 30 avionë luftarakë, avionë furnizimi, si dhe furnizime ushtarake.
Synimi do të jetë nisja e goditjeve të pozicioneve të ISIS-it që gjenden vetëm 200 kilometra larg nga baza. Burimet në kryeqytetin turk bëjnë të ditur se sulmet ajrore nuk do të kërkojnë vetëm t’i dobësojnë pozitat e militantëve të ISIS-it, por gjithashtu të bëjnë të mundur krijimin e një zone të sigurt në veri të Sirisë.
Operacioni i përbashkët për të krijuar një zonë të lirë nga ISIS-i do të nisë sapo në bazë të mbërrijnë tërë pajisjet dhe personeli amerikan. Duke iu përmbajtur gjithmonë marrëveshjes së fundit, SHBA-të kanë nisur mbulimin ajror në terren për forcat e opozitës së moderuar.
Zyrtarët amerikanë dhe turq kanë biseduar mes tyre dhe mbi mënyrën e përdorimit të bazës së Inxhirlikut. Ankaraja është pajtuar ta lejojë koalicionin e udhëhequr nga SHBA-të ta përdorë bazën ajore nën kontrollin e saj. Po ashtu ajo ka premtuar dhe një pjesëmarrje aktive në operacionet e koalicionit nëse kërcënohet siguria e kufirit turk. E veçanta është se avionët turq nuk parashikohet të ngrihet nga baza ajrore e Inxhirlikut, por nga bazat e tjera ajrore pranë. /tesheshi.com/
