Sot bëhen 27 vjet që kur delegatët e atëhershëm të Kuvendit të Kosovës, miratuan Deklaratën Kushtetuese të pavarësisë e njohur si Deklarata e 2 Korrikut.
Në këtë ditë historike, Kosova u shpall njësi e veçantë, në kuadër të federatës së atëhershme jugosllave.
Deklarata Kushtetuese e 2 Korrikut të vitit 1990 shënoi hapin historik institucional të pavarësimit të Kosovës, i cili u zhvillua jashtë objektit të Parlamentit, në kushte të rrethimit nga forca të mëdha policore e ushtarake.
Deklaratën Kushtetuese mbi Kosovën, si njësi të pavarur dhe të barabartë në kuadër të federatës apo konfederatës jugosllave, e shpallën në Prishtinë 111 delegatët shqiptarë, po edhe të komuniteteve të tjera.
Deklarata Kushtetuese e 2 Korrikut shënon edhe pikënisjen për pavarësimin e Kosovës nga Serbia, duke synuar që të trajtohet si e barabartë me republikat e atëhershme socialiste në federatën jugosllave.
Këtë datë historike e kanë kujtuar dy kandidatët për kryeministër, Ramush Haradinaj i koalicionit PDK-AAK-NISNA dhe Avdullah Hoti i koalicionit LDK-AKR-Alternativa.
Haradinaj, përmes një shkrimi në Facebook ka thënë se delegatëve të 2 Korrikut do t’u njihet statusi i deputetit dhe të gjitha privilegjet që nënkupton ky status.
“Ata janë delegatët e “2 Korrikut të Pavarësisë”. Sot është përvjetori i Deklaratës së 2 Korrikut, me të cilën u bë edhe hapi i parë formal drejt pavarësimit të Kosovë. 111 delegatë të Kuvendit të Kosovës, në kushte shtetrrethimi, patën guximin ta vendosin gurin e parë në themelin e një shteti që ishte nisur rrugës së pavarësisë”, ka shkruar Haradinaj.
Më tutje ai ka shkruar se për fat të keq, ky hap sublim i tyre, asnjëherë nuk u vlerësua, sa e si duhet.
“Këta delegatë, që pak më vonë miratuan edhe Kushtetutën e Kaçanikut, në historinë e Kosovës do të mbeten ‘Delegatë të Pavarësisë’, prandaj atyre edhe do tu njihet statusi e deputetit dhe të gjitha privilegjet që nënkupton ky status.
Deklarata e 2 Korrikut e vitit 1990, duhet të ruhet në kujtesën tonë, si ndër të rrallat ngjarje që e bënë historinë e Kosovës”, ka shkruar Haradinaj.
Ndërsa Hoti ka thënë se Deklarata Kushtetuese e 2 korrikut 1990 është pikënisje në rrugëtimin për pavarësinë e Kosovës.
“Ky akt ka shprehur qarte aspiratat e shumicës së popullsisë në Kosovë për pavarësi. Respekt për gratë dhe burrat e Kuvendit të atëhershëm të Kosovës që ndërmorën ketë hap shumë vizionar duke pasur parasysh rrethanat në të cilat ndodhej vendi dhe konteksti i zhvillimeve në rajon dhe më gjerë”, ka shkuar Hoti në “Facebook”. /tesheshi.com/
Video e Deklaratës Kushtetuese :
