Të gjithë e kanë të nevojshme të kursejnë, [asi për shumë njerëz sot është mjaft e vështirë të arrijnë deri në fund të muajit me të ardhurat e tyre. Ndonëse nuk mund të bëjmë shumë për ta ndryshuar gjendjen e ekonomisë në përgjithësi, ne mund të ndjekim një sërë “marifetesh” për të kursyer.
Lajmi i mirë është se ne në fakt shpërdorojmë vazhdimisht para, por me pak mundim e duke qenë të vëmendshëm mund të arrijmë të shkurtojmë shpenzimet tona. Këtu po ju tregojmë 10 metoda për të shkurtuar shpenzimet, por pa bërë ndonjë ndryshim të madh në jetën tuaj.
- Mbani shënim shpenzimet që bëni. A e dini sa keni shpenzuar muajin e kaluar? Shumica e njerëzve nuk e dinë në fakt. Por të diturit e shpenzimeve është hapi i parë i domosdoshëm për të kuptuar ku mund të shkurtojmë. Përndryshe rrezikojmë të harxhojmë energji duke shpenzuar në gjëra të parëndësishme, pa e vënë re se ka gjëra të tjera më të rëndësishme.
- Ndani nevojat nga dëshirat. Mos i ngatërroni gjërat për të cilat keni nevojë me ato të cilat ju pëlqejnë. Për këto të fundit duhet të siguroheni se do të shpenzoni vetëm nëse mund t’ia lejoni vetes.
- Shmangni marrjen e huave. Ekzistojnë mundësi të mira (në dukje) për të marrë hua. Por huatë do të duhej të përdoren vetëm për shpenzimet e nevojshme, përndryshe do të përfundoni në një vorbull borxhesh të panevojshme.
- Vendosini vetes si synim që çdo muaj të hiqni diçka mënjanë. Nëse keni një llogari apo një vend ku mund t’i ruani paratë tuaja, atëherë nuk do të ishte ide e keqe nëse çdo muaj hidhni diçka aty.
- Jini të vëmendshëm ndaj siguracioneve. Siguracionet, duke nisur nga ajo e makinës, janë nganjëherë shpenzime të mëdha. Sigurohuni që të keni zgjedhur kompaninë dhe policën e duhur që përshtatet me të ardhurat tuaja.
- Shikoni më pak televizor. Këtu nuk ka asgjë për t’u habitur. Sipas disa ekspertëve, të shikuarit e televizorit i shtyn njerëzit të blejnë gjëra të panevojshme. Arsyeja ka të bëjë me mënyrën si u bëhet reklamë produkteve të paraqitura.
- Planifikoni vaktet e javës. Nëse planifikoni vaktet e të gjithë javës mund t’i bëni blerjet në varësi të kësaj, duke shmangur harxhime të kota parash në gjëra që pastaj nuk do t’i përdorni.
- Bëni listën e blerjeve para se të bëni pazarin. Blerjet e rastit apo impulsive, janë nganjëherë një mënyrë për të shpenzuar më shumë se sa kemi nevojë. Të paturit e një liste të detajuar të gjërave që na duhen për të blerë mund ta zgjidh këtë problem. Kjo mund t’ju ndihmojë edhe në zgjedhjen e dyqanit me çmimet më të leverdishme.
- Bëni pazarin vetëm. Sipas disa studimeve, të bërit e pazarit duke qenë i shoqëruar favorizon blerjet impulsive dhe shpërqëndrimin në zgjedhjet që bëjmë, duke çuar në shpenzime të tepërta.
- Pini shumë ujë. Kjo nuk është vetëm çështje shëndeti: të pish ujë në vend të pijeve mund t’ju bëjë të kurseni shumë.
