Prokuroria pritet të marrë nën hetim ish-drejtorin çek të kompanisë CEZ në Shqipëri, Josef Hajsek.
Hetimi ndaj ish-kreut të ndërmarrjes çeke që bleu në 2009-ën kompaninë publike të shpërndarjes së energjisë, bëhet pasi ai akuzohet se është njëri nga bashkëpunëtorët e Kastriot Ismailajt, i arrestuar prej pesë muajsh për mashtrimin pesë milionë euro në dëm të shtetit shqiptar dhe CEZ.
Pozitat e Hajsek mund të rëndohen akoma më tej, që do të thotë se prokurorët pritet ta marrin atë të pandehur për të njëjtat akuza të ngritura më herët ndaj 52-vjeçarit Ismailaj, administrator i shoqërisë DIA dhe i pesë kompanive të tjera, tek të cilat janë kryer transaksione me vlera të konsiderueshme.
Prokurorët e njësisë task-force pretendojnë se kanë prova të mjaftueshme, pas një periudhe të gjatë hetimore, ku pjesë e dosjes janë edhe firmosja e marrëveshjes mes përfaqësuesit të DIA-s Ismailaj dhe dy përfaqësuesve të CEZ, me personazh kryesor kryetarin e bordit drejtues, Josef Hajsek.
Hajsek duket se ka rol aktiv në skemën e mashtrimit, që dyshohet se ka nisur para lidhjes së kotratës së parë për mbledhjen e borxheve e që mban datën 1 tetor 2010. Sipas prokurorisë, Ismailaj ka paraqitur të dhëna të rremë dhe dokumenta fiktive për strukturën dhe eksperiencën e DIA-s, një shoqëri e regjistruar në regjistrin tregtar dy muaj para firmosjes së marrëveshjes, ndërkohë që në referim të tyre palët kanë firmosur.
Opozita ka paralajmëruar se të hënën do të dërgojë në Gjykatën Kushtetuese marrëveshjen mes qeverisë shqiptare dhe kompanisë CEZ, e ratifikuar edhe nga Parlamenti, që zgjidh pronësinë mbi operatorin e shpërndarjes, e cila sheshon të gjitha mosmarrëveshjet dhe pretendimet e Shqipërisë mbi këtë kompani.
Ajo parashikon edhe mosfillimin e çështjeve hetimore ndaj kësaj kompanie dhe punonjësve të saj. Por burime pranë prokurorisë së përgjithshme bëjnë të ditur se kjo marrëveshje nuk e pengon organin hetimor të hetojë për vepra penale ku dyshohet të jenë përfshirë ish zyrtarë apo nëpunës të kompanise çeke.
KLSH
Kontrolli i Lartë i Shtetit ka paditur penalisht në prokurori ish-administratorin e CEZ-it, Arben Seferi, si dhe dy ish-drejtues të tjerë të kësaj kompanie, për akuzat e shpërdorimit të detyrës me pasojë dëm ekonomik ndaj interesave të shtetit.
Sipas materialit të referuar nga KLSH, Seferi dhe dy ish-drejtuesit e departamentit të shitjeve dhe ai i shërbimeve mbështetëse, me veprimet dhe mosveprimet e tyre kane shkaktuar një dëm ekonomik buxhetit të CEZ Shpërndarje dhe për rrjedhojë edhe buxhetit të shtetit, që arrin në vlerën 32 milione euro dhe të ardhurat e munguara që arrijnë në vlerën 5 milione eurove.
Sipas Kontrollit të Lartë të Shtetit dëmi i lartëpërmendur ekonomik ka ardhur si pasojë, blerjes e pajisjeve dhe materialeve elektrike emergjente për nevojat e shoqërisë, në vitin 2014,duke paguar 50-70 per qind më shumë se vlera e kontratës me prokurim të drejtëpërdrejtë. Tjetër shkelje sipas KLSH është moszbatimi i kuadrit rregullator për blerjet e energjisë elektrike, duke e blerë atë me çmime më të larta se ato të tregut, si dhe uljen artificiale të humbjeve teknike, nëpërmjet mbifaturimit të konsumatorëve.
Për të gjitha këo shkelje dhe dëmet ekonomike të shkaktuara interesave të shtetit, KLSH, ka identifikuar si persona përgjegjës, ish-administratorin e CEZ, Arben Seferi si dhe dy drejtuesit e departamentitn të shitjeve dhe atë të shërbimeve mbështetëse, për të cilët i kërkon prokurorisë të fillojë hetimet për veprën penale të shpërdorimit të detyrës.
/tesheshi.com/
