Vëzhguesit afatgjatë tashmë kanë mbërritur në Maqedoni dhe janë njohur me aktivitetet që duhet të kryejnë në të gjithë vendin.
Shefja e misionit të vëzhguesve të OSBE/ODIHR, ambasadorja Odri Glover tha se për zgjedhjet vendore të 15 tetorit janë 20 vëzhgues afatgjatë, ndërsa ende nuk ka një numër të saktë të atyre afatshkurtër. Gjithsesi Glover tha se do të ketë një numër të mjaftueshëm që do të shpërndahen nëpër vendvotime për të vëzhguar proçesin dhe numërimin e votave.
Vëzhguesit kanë bërë punën e tyre në këtë periudhë parazgjedhore, pasi OSBE vlerëson se nuk është e rëndësishme vetëm dita e zgjedhjeve, por ecuria e tërë procesit që nga shpallja e zgjedhjeve lokale.
“Disa prej vërejtjeve tona nga zgjedhjet e kaluara, tashmë duhet të jenë bërë pjesë e legjislatives suaj, për mënyrën e financimit të fushatës zgjedhore, ndarjen e partisë nga shteti, gjithashtu dhe për proçedurën e vërejtjeve dhe kërkesave drejtuar KSHZ-së, do të shohim se si do të implementohen në këto zgjedhje, rekomandimet e caktuara ligjore, pra na mbetet të shohim e të vlerësojmë nëse do të implementohen ose jo në tërësi”, u shpreh Odri Glover.
Sipas ambasadores, gjithsesi është herët që në këtë fazë të jepen vlerësime për proçesin zgjedhor dhe OSBE vlerësimin do ta japë në fund të proçesit, në raportin përfundimtar. /tesheshi.com/
