Kuvendi do të mblidhet në orën 18:00 të pasdites së sotme për të vijuar proçedurat për zgjedhjen e kryetarit të ri të Parlamentit, i cili do të jetë Gramoz Ruçi.
Ndërkohë, jashtë sallës së Kuvendit, shoqatat e ish-të përndjekurve dhe të rinjtë e FRPD pritet të zhvillojnë protestën kundër kandidaturës së Gramoz Ruçit.
Shkak, sipas tyre, është fakti se Ruçi ka qenë ministri i fundit i Brendshëm i sistemit diktatorial, madje edhe në kohën e vrasjes së 4 të rinjve në Shkodër më 1991, të cilët janë shpallur Dëshmorë të Demokracisë.
PD ndërkohë ka deklaruar votën e saj kundër Ruçit, por nuk do të ndërmarrë asnjë veprim për bllokimin e seancës. Pas votimit, deputetët demokratë do t´I bashkohen protestës.
Kundër kandidaturës së propozuar nga PS pritet të votojnë edhe deputetët e LSI-së, vendim ky që është artikuluar nga kreu i grupit parlamentar të kësaj partie, Petrit Vasili.
Megjithatë, votimi do të jetë i fshehtë, që do të thotë se mund të ketë surpriza në rezultatin përfundimtar dhe me shumë gjasa pro Ruçit të votojnë më shumë deputetë sesa është numri i socialistëve në Kuvend. /tesheshi.com/
