Në përgjigje të trazirave të fundit dhe plagosjes së 30 anëtarëve të forcave të NATO-s në veri të Kosovës, NATO ka vendosur të dislokojë një numër shtesë ushtarësh nga Forca Rezervë Operacionale (ORF) në Ballkanin Perëndimor.
Ky vendim është bërë i ditur në Tëitter nga Komanda e Forcave të Përbashkëta të NATO-s nga Napoli dhe ndër të tjera kanë thënë se dhuna duhet të ndalet dhe se të dyja palët duhet të përmbahen nga veprimet që cenojnë paqen.
Ambasadori amerikan në Kosovë Jeffrey Hovenier tha sot se Qeveria e Kosovës nuk është koordinuar me SHBA-në për veprimet e ndërmarra më 26 maj, kur hynë kryetarët e rinj shqiptarë të komunave në veri të Kosovës, me ndihmën e Policisë së Kosovës, në ndërtesat e komunave të Zubin Potokut, Leposaviqit dhe Zveçanit të cilat janë kryesisht të banuara me serbë, gjë që shkaktoi reagime të dhunshme në ato qytete e më pas trazira.
“Kur e morëm vesh, reaguam ashpër kundër tij. Vendimi pati një ndikim negativ në reputacionin e Kosovës dhe ktheu përpjekjet drejt normalizimit të marrëdhënieve ndërmjet Kosovës dhe Serbisë.
Kemi kërkuar nga kryeministri i Kosovës që të ndërmarrë hapa për uljen e tensioneve në veri, por ai nuk iu përgjigj këtyre kërkesave”, tha Hovenier.
Ambasadori amerikan ka konfirmuar edhe anulimin e pjesëmarrjes së Kosovës në stërvitjet ushtarake “Defender Europe 2023”, që është pasoja e parë për qeverinë e Kosovës pas trazirave të djeshme.
Sekretari amerikan i Shtetit, Antony Blinken, më herët ka paralajmëruar se veprimet e qeverisë së Kosovës në veri të vendit do të kenë pasoja në marrëdhëniet dypalëshe.
“Treguesi i parë i kësaj ishte vendimi i mbrëmshëm nga komandanti amerikan për Evropën për të anuluar pjesëmarrjen e Kosovës në ‘Defender Europe 2023’, i cili ndodhi brenda natës”, tha Hovenier, duke shtuar se SHBA po mendojnë edhe për vendime të tjera që do të marrin në këtë drejtim.
Kështu, duket se SHBA po ndjek tjetër strategji për çështjen e Kosovës, ndryshe nga Prishtina zyrtare, nga e cila kërkon që ta ndjekë pas dhe kur s’i pëlqen.
Zgjedhjet e bojkotuara nga serbët nga të cilat dolën kryekomunarë shqiptarë u njohën si legjitime nga Perëndimi, por futja e tyre në zyra, së paku tani për tani, nuk përkrahet prej tyre. /tesheshi.com/
