Angela Merkel në vizitën e saj të parë zyrtare që zhvillohet më Tiranë do të qëndrojë vetëm 4 orë dhe pritet që gjatë kësaj vizite të bëhet e ditur lëvrimi i një ndihme të konsiderueshme ekonomike për shqipërinë. Gjatë kësaj vizite, Kancelarja Merkel, nuk do të takojë as kreun e Kuvendit, Ilir Meta dhe as liderin e opozitës Lulzim Basha.
Kancelarja gjermane, Angela Merkel do të mbërrijë në aeroportin e Rinasit në orën 13. 50 minuta të datës 8 korrik për të qënduar përreth 4 orë në kryeqytetin shqiptar.
Zyra e shtypit në kryeministri ka bërë sot publike axhendën e vizitës historike. Në orën 14 15 zhvillohet ceremonia e pritjes në Kryeministri, ndërsa në 15:30 zhvillohet konferenca e përbashkët për shtyp Rama-Merkel.
Kancelarja gjermane rreth orës 16:10 do të zhvillojë një takim me kreun e shtetit Bujar Nishani, ndërsa sipas axhendës zyrtare nuk pritet të shtrëngojë duart as me kreun e Kuvendit, Ilir Meta dhe as liderin e Opozitës, Lulzim Basha.
Në orën 17 00 kancelarja Merkel do të marrë pjesë në konferencën ekonomike që do të mbahet tek “Tirana Biznes Park”, një investim gjerman që u përurua pak ditë më parë nga kryeminsitri Rama.
Ndërsa në orën 18:00 kancelarja gjermane, do të lërë Shqipërinë. Kjo është vizita e dytë e një kancelari gjerman, pas asaj të Gerhard Shrëdër në vitin 1999, që erdhi në Shqipëri për të takuar trupat gjermane të KFOR, që ishin stacionuar në vendin tonë, si pjesë e misionit paqeruajtës në Kosovë. /tesheshi.com/
