Kryeministri serb, Aleksander Vuçiç, ka deklaruar se në mesin e muajit do të vizitojë Preshevën, duke shënuar kështu të parën vizitë zyrtare të një kreu të qeverisë së Beogradit në krahinën e banuar nga shqiptarë.
Deklaratën e tij Vuçic, e ka bërë në një seancë pyetjesh me deputetin shqiptar në Parlamentin serb, Riza Halimi.
Siç njofton “Presheva Jonë”, vizita e Vuçiç në Preshevë mësohet se do të zhvillohet gjatë festimeve të Fiter Bajramit, pas mbylljes së Muajit të Ramazanit.
Kjo vizitë është pjesë e një procesi që ka nisur në Ballkan për normalizimin e marrëdhënieve ndërshtetërore dhe ndëretnike. Këtë javë Beogradin ashtu si dhe Tiranën do ta vizitojë kancelarja gjermane, Angela Merkel, si një përpjekje për të dhënë mbështetjen e Berlinit për një proces pajtimi dhe bashkëpunimi rajonal.
“Qëllimi ynë është një marrëveshje afatgjatë dhe zgjidhjen e problemeve në jug të Serbisë që serbët dhe shqiptarët të jetojnë te lumtur me njëri-tjetrin ose pranë njëri-tjetrit ”, tha Vuçiç duke u përgjigjur në pyetjen e deputetit të Partisë për Veprim Demokratik, Riza Halimi.
Ndërkaq, Ministri i Shëndetësisë së Serbisë Zlatibor Lonçar, duke u përgjigjur pyetjeve në lidhje me maternitetin në Preshevë, tha se të gjitha kushtet janë plotësuar dhe ai u shpreh i habitur pse materniteti nuk funksionon. Ai tha se nisja e punës së këtij spitali në Preshevë mbetet në duart e përfaqësuesve komunal.
Ministri i Drejtësisë, Nikolla Selakoviç tha se së shpejti do të punohet për krijimin e njësisë së gjykatës në Preshevë, dhe në emërimin e gjyqtarëve dhe prokurorëve të përkatësisë etnike shqiptare, si dhe për emërimin e një përkthyesi të certifikuar gjyqësor për gjuhën shqipe në Vranjë.
Ndërkaq, disa media serbe të tipit “tralala” kanë nisur menjëherë shpotitë folklorike të llojit: “Nipi do të shkojë për vizitë të dajat” dhe kanë vendosur një fotomontazh ku Vuçiçit i kanë vënë në kokë një qeleshe(plis). /tesheshi.com/
