Presidenti serb Aleksandar Vuçiç dhe Sekretari i Përgjithshëm i NATO-s Jens Stoltenberg, iu drejtuan publikut pas një takimi mes tyre në Bruksel.
Stoltenberg tha se “dialogu konstruktiv është mënyra e vetme për zgjidhjen e tensioneve në Kosovë”.
“U bëj thirrje të gjitha palëve të tregojnë përmbajtje dhe të shmangin dhunën”, shtoi ai.
Ndërsa Vuçiç tha se roli i KFOR-it, të cilin ai e respekton, roli i NATO-s, të cilin ai e respekton, është i rëndësishëm për Serbinë.
“Ne besojmë se do të jemi gjithmonë në gjendje të gjejmë mirëkuptimin e Stoltenberg dhe NATO-s për të siguruar paqen dhe stabilitetin. Nuk më pëlqen t’ia hedh fajin askujt tjetër”, tha Vuçiç.
“Ne duam të shmangim çdo mundësi përshkallëzimi apo konflikti”, shtoi ai.
Në përgjigje të pyetjeve të gazetarëve, ai ka theksuar se ushtria dhe policia serbe “nuk e kanë kaluar vijën administrative në asnjë moment”.
“Kam dorëzuar listën e të gjitha sulmeve ndaj serbëve. I jam mirënjohës NATO-s që nuk ka dalë me të pavërteta të tilla, ndryshe nga disa të tjera”, tha Vuçiç.
Presidenti serb përsëriti edhe një herë se vendi i tij do të mbetet ushtarakisht neutral.
“Serbia është një vend ushtarakisht neutral dhe i tillë do të mbetet. Historia jonë nuk është e lehtë, por ne duam të forcojmë bashkëpunimin me KFOR-in dhe NATO-n dhe të shmangim përshkallëzimin e konfliktit. Nuk mendojmë se kemi shkaktuar ndonjë provokim, por e kuptoj që ne nga Ballkani i kemi mërzitur të gjithë në Bruksel”, tha Vuçiç.
“Pikëpamja e vendeve të Quint-it dhe e jona për situatën në Kosovë është e ndryshme. Ajo që ne kemi nënshkruar është se njësitë e tyre speciale kanë qasje të kufizuar në veri. E justifikojnë duke luftuar krimin. Jemi në një pozitë shumë të vështirë në këtë drejtim. Është shumë e vështirë kur je në qoshe dhe nuk ke ku të shkosh tjetër, kështu i thashë Jens-it. Mos prisni që serbët të kënaqen dhe të thonë sa të mirë janë.
Ka një gjeneratë të re të serbëve që nuk do të tolerojnë terrorin. Ata nuk e perceptojnë Kosovën si një territor të pavarur, por si një territor të Serbisë dhe nuk do ta tolerojnë këtë”, tha Vuçiç dhe përfundoi se “është e rëndësishme për popullin e Serbisë që ne e kemi shpjeguar qëndrimin tonë” në Bruksel. /tesheshi.com/
